ՀՀ առաջին նախագահ Լևոն Տեր-Պետրոսյանի ազգային անվտանգության հարցերով նախկին խորհրդական, Միչիգանի համալսարանի պրոֆեսոր, պատմաբան Ժիրայր Լիպարիտյանը երեկ հրապարակած իր «Վճռական պահ հայ ժողովրդի պատմության մեջ» հոդվածում նաև հետևյալ հարցադրումն էր արել. «Հարգանքի արժանի որևէ տնտեսագետ գոյություն ո՞ւնի արդյոք, որը կարծում է, թե մեկուսացված ու շրջափակված Հայաստանը կարող է կայուն զարգացում ապահովել, որը կխթանի Հայաստանում աճող եռանդն ու տաղանդը»:
Հնարավո՞ր էր (է) արդյոք Հայաստանում կայուն զարգացում ապահովել առանց շրջափակումների վերացման: Այս հարցը «Առաջին լրատվականը» ուղղեց ԱԺ տնտեսական հանձնաժողովի փոխնախագահ Վարդան Բոստանջյանին: «Ուզում եմ համոզված ասել, որ ՀՀ-ն ցանկացած, մինչև անգամ ամենադժվար իրավիճակում ի զորու է ապահովել հարաբերական կայունություն, անկախ շրջափակումներից, ռազմավարական ռեսուրսների բացակայությունից, անկախ սոցիալական՝ դեռևս դժվարին խնդիրների առկայությունից»,- նշեց Վ. Բոստանջյանը:
Հարցին, թե կարող է Հայաստանը տարածաշրջանային երկրներից հետ չընկնել և զարգանալ շրջափակման պայմաններում, Վ. Բոստանջյանը պատասխանեց. «Զարգացումը պայմանավորված է արտաքին ու ներքին գործոնների ինտեգրալից, որոնք ի վերջո հայ մարդը կարողանում է ուղղել դեպի Հայաստանի շահերը»:
