Հունաստանը աննախադեպ սադրանք է համարում Թուրքիայի նախագահ Ռեջեփ Թայիփ Էրդողանի այցը ինքնահռչակ Հյուսիսային Կիպրոսի Թուրքական Հանրապետություն (ՀԿԹՀ) և նրա ծրագրված այցը օկուպացված Վարոշա, որը գտնվում է Ֆամագուստա կղզու նախկին հանգստյան գոտու բուֆերային հատվածում, որտեղից 46 տարի առաջ վտարվել էին Կիպրոսի հույները, հաղորդում է ՏԱՍՍ-ը:
«Կիպրոսի գրավյալ տարածքները որպես թուրքական միավորում միակողմանի և ապօրինի հռչակման տարեդարձի առթիվ մի խումբ պետական պաշտոնյաների ուղեկցությամբ Թուրքիայի նախագահի պլանավորված այցը օկուպացված Վարոշա աննախադեպ սադրանք է, որը լիովին հակասում է ՄԱԿ-ի Անվտանգության խորհրդի 550 և 789 բանաձևերին, ինչպես նաև Եվրոպական խորհրդի եզրակացություններին»,- ասված է Հունաստանի արտաքին գործերի նախարարության՝ շաբաթ օրվա տարածած հայտարարության մեջ:
Արտաքին գործերի նախարարության խոսքով ՝ «այս գործողությունը գումարվում է Արևելյան Միջերկրական ծովում Թուրքիայի կողմից անընդհատ աճող իրավախախտումների սրացմանը։
Մենք դա դատապարտում ենք ամենավճռական ձևով և սպասում ենք դրա համապարփակ քննարկմանը դեկտեմբերին կայանալիք Եվրոպական խորհրդի առաջիկա նիստում», – շեշտել է ԱԳՆ-ն:
«Հունաստանը, ինչպես բազմիցս շեշտվել է, կողմ է ՄԱԿ-ի Գլխավոր քարտուղարի հովանու ներքո բանակցությունների վերսկսմանը՝ Կիպրոսի խնդրի համապարփակ, արդար և տևական լուծում գտնելու համար`հիմնված ՄԱԿ-ի Անվտանգության խորհրդի որոշումների և Եվրամիության իրավական դաշտի վրա: Այդ նպատակին հասնելու համար մեր երկիրը մշտական համակարգման և բացարձակ փոխըմբռնման մեջ է Կիպրոսի կառավարության հետ»,- եզրափակել է ԱԳՆ-ն:
