«Այս պահին ես առաջնահերթ եմ համարում պետության ֆունկցիաների կատարման կարողությունների վերականգնումը։ Դա այսօրվա պետական պաշտոնյաների թիվ մեկ պարտականությունն է, նման գիտակցում պետք է ունենան նաև մեր քաղաքացիները»,- «Առաջին լրատվական»-ի հետ զրույցում նման տեսակետ հայտնեց քաղաքագետ Ռուբեն Մեհրաբյանը։
Մեր զրուցակցի խոսքով՝ պետք է սառել, էմոցիոնալ քայլերից ու հայտարարություններից զերծ մնալ. «Պետք է առաջնորդվել բանականությամբ և ոչ էմոցիաներով»։
Նրա դիտարկմամբ՝ կա հեղաշրջման վտանգ, ինչը չպետք է թույլ տալ. «Մենք չպետք է թույլ տանք, որ մեր պետությունը կազմալուծվի մեր անխոհեմության պատճառով։ Այդ իմաստով ես ողջունում եմ ՀՀ նախագահի առաջարկությունը՝ քաղաքական խորհրդակցությունների շարք սկսելու վերաբերյալ։ Սա ճիշտ մոտեցում է։ Հարցերը պետք է լուծվեն երկխոսության միջոցով։ Բայց մինչև երկխոսությունն էլ պետք է հասկանալ, թե ինչ է տեղի ունեցել։ Իսկ հասկանալու համար պետք է սթափություն, բանականություն»։
