Թբիլիսիի կենտրոնում ընդդիմությունը բազմահազարանոց ցույց է անցկացնում, որի մասնակիցները պատրաստվում են շարժվել դեպի Կենտրոնական ընտրական հանձնաժողովի շենք և սահմանափակել աշխատակիցների մուտքը, հաղորդում է «ՌԻԱ Նովոստի»-ն:
Հանրահավաքի մասնակիցները վերջնագիր են ներկայացրել Կենտրոնական ընտրական հանձնաժողովի ղեկավար Թամար Ժվանիային և իշխող «Վրացական երազանք» կուսակցության առաջնորդ Բիձինա Իվանիշվիլիին: Նրանք ԿԸՀ ղեկավարին պաշտոնանկ անելու համար ժամանակ էին տվել մինչև ժամը 20.00-ը: Վերջնագրի ժամկետը լրացել է: Դրանից հետո ցուցարարները որոշել են շարժվել դեպի Կենտրոնական ընտրական հանձնաժողովի շենք:
«Սա ամենաբազմամարդ երթը կլինի, վաղվանից ոչ մի աշխատակից չի մտնի այս շենք»,- ասել է «Միացյալ ազգային շարժում» ընդդիմադիր կուսակցության առաջնորդ Նիկա Մելիան:
Ակցիայի մասնակիցները պահանջում են նշանակել նոր խորհրդարանական ընտրություններ, քանի որ չեն ընդունում հոկտեմբերի 31-ի քվեարկության օրինականությունը: Ըստ ԿԸՀ-ի վերջնական տվյալների, հաղթել է «Վրացական երազանք» իշխող կուսակցությունը, մինչդեռ խորհրդարան են մտնում մեկ տոկոսանոց արգելքը հաղթահարած, ընդհանուր առմամբ, յոթ քաղաքական սուբյեկտ: