«Առաջին լրատվականի» այն դիտարկմանը, թե պատրա՞ստ է արդյոք նորընտիր ԿԸՀ-ն արտահերթ ընտրությունների, ԿԸՀ նախկին անդամ, «Ժողովրդի իշխանություն» հասարակական-քաղաքական նախաձեռնության հիմնադիր անդամ Զոյա Թադևոսյանը պատասխանեց.
«ԿԸՀ-ի պատրաստ լինելու խնդիրն այնքան էլ առաջնահերթ չէ, քանի որ ԿԸՀ-ի այն կազմը, այն ընտրական օրենսգիրքը, որն այսօր ընդունվել է և դրվել է ընտրական հնաձնաժողովների սեղանին, օգտակար չի կարող լինել արտահերթ ընտրությունների ժամանակ։ Եթե արտահերթ ընտրությունների մասին համաձայնությունը կատարվի, առաջնահերթ պետք է ընտրական օրենսգիրքը և ընտրական հանձնաժողովների կազմման կարգը փոխվի»։
Անդրադառնալով ԿԸՀ նախագահ Գարեգին Ազարյանի այն դիտարկմանը, թե ԿԸՀ-ն ունի առնվազն 14 հազար տեղամասային ընտրական հանձնաժողովների անդամների թեկնածուների ուսուցման խնդիր՝ Զ.Թադևոսյանն ասաց.
«Համաձայն չեմ նրա ասածի հետ, որովհետև ուղղակի հանձնաժողովի անդամները պետք է լավ իմանան ինչպես կազմակերպել տեղամասում ընտրությունները, ինչպես իրականացնել քվեարկությունը և ինչպես կատարել ձայների հաշվարկը։ Այդ գործընթացների կատարումը էական փոփոխությունների չի ենթարկվել ընտրական օրենսգրքում, այնպես որ դրանք արդեն մեր հասարակության լայն շերտերի գիտելիքների մաս են կազմում, և նրանք, ովքեր նախկինում մասնակցել են ընտրություններին, ավելի հեշտությամբ կարող են մասնակցել նաև այս ընտրություններին։ Իսկ նախկինում, երբ չէին ուսուցանվում մարդիկ և հատուկ լիցենզիաներ չէին ստանում, ավելի պակա՞ս արդար էին կազմակերպվում ընտրությունները կամ հաշվարկներն ավելի պակա՞ս օբյեկտիվությամբ էին կատարում՝ ոչ, դա լուծելի խնդիր է, ցանկություն է պետք և կամք»,- ապա հավելեց.
«Դա լրացուցիչ, մտացածին խոչընդոտ է՝ դժվարեցնելու կամ արտահերթ ընտրության հարցը դարձնելու անիրագործելի, բայց ոչինչ անիրագործելի չկա, բացի մարդու վերակենդանացումից, մնացած բոլոր խնդիրները լուծելի են»։
