100 տարի անց պատմությունը կրկնվում է. նորից հային վերացնելու ցանկությունն է, նորից նույն անտարբեր աշխարհը. ի՞նչն է փոխվել: «Մենք այլևս առաջվա հայը չենք, մենք ավելի ուժեղ ենք, քան առաջ: Մենք այսօր ունենք շատ ավելի լավ պայմաններ՝ ինքնուրույն ոտքի վրա կանգնելու, քան ունեինք 100 տարի առաջ: Մենք ուժեղ էինք և ուժեղ ենք մեր ոգով, նաև մեր զենքով, մեր գեներալներով: Այս մասին «Առաջին լրատվական»-ի հետ թեմայի շուրջ զրույցում ասաց ՀՀ վաստակավոր արտիստ, դերասան Դավիթ Հակոբյանը:
Նրա դիտարկմամբ՝ այսօր կա նաև մի ուրիշ բան, որը 100 տարի առաջ չկար, և դա մի քիչ վտանգավոր է. «Դա բակային խոսակցությունների հանրային դաշտն է և դրա դրսևորման ձևը սոցցանցերն են. սոցցանցերը որքան օգնում, տասնապատիկ ավելի հարվածում են ռազմաճակատին: Ես կոչ չեմ անում Ադրբեջանի նման փակել սոցցանցերը, բայց դրա նեգատիվին տրվելու իրավունք չունենք»:
«Հաղթանակը ճառագող մարդն է, պարտությունը՝ մթնած մարդը… Քո սևերն արդեն քո նախնին հագել մաշել է, մի անգամ կարմիր հագնելու՞ ես. քեզ միայն հաղթանակ է տրված»,- Հրանտ Մաթևոսյանի ստեղծագործությունից մեջբերում կատարեց Դավիթ Հակոբյանը:
«Չի կարելի չափազանց շատ քաղաքականացնել հասարակությանը… Չի կարելի եվրոպական կեղծ հանդուրժողական քաղաքականության չափորոշիչներով կրթել հասարակությանը: Նայեք՝ մեր կռվող սերնդին, ու սովորեք, թե որոնք են մեր հայրենասիրության չափորոշիչները»,- ասաց դերասանը՝ հավելելով, որ մենք պատմությունից դասեր ենք քաղել, այլապես չէինք կարող դիմակայել այս պատերազմին: Նրա խոսքով՝ մենք հասկացել ենք, որ միայն մենք ենք մեր ընկերը և մեր զինվորը պետք է մեզ պաշտպանի:
Մանրամասն՝ տեսանյութում: