Վրաստանում բնակվող էթնիկ հայերը հերթական խաղաղ երթն են անցկացրել Թբիլիսիում: Այն կազմակերպել է Վրաստանի Հայ երիտասարդների միությունը:
Ակցիայի մասնակիցները հանդես են եկել ի պաշտպանություն Արցախի արդար պայքարի: Երթի վերջնակետը Սուրբ Էջմիածին եկեղեցին էր, որտեղ մատուցվել է խաղաղության պատարագ:
Ավելի վաղ Թբիլիսիում բնակվող հայերը ցույց էին կազմակերպել «Մտավարի արխի» հեռուստաընկերության գրասենյակի մոտ՝ հայտարարելով, որ հեռուստաալիքը կանխակալ է լուսաբանում Արցախյան հակամարտության հետ կապված իրադարձությունները և «ադրբեջանա-թուրքական քարոզչություն» է տարածում: Նրանք դատապարտել են նաև Սահակաշվիլիի խոսքերը, որը հայտարարել էր, որ «Արցախն Ադրբեջանի ինքնիշխան տարածքն է»:
Սամցխե-Ջավախեթիում նույնպես իրականացվում են գործողություններ՝ ի պաշտպանություն Հայաստանի և Արցախի: JNEWS պարբերականը հաղորդել է, որ վրացական այս տարածաշրջանից արդեն 18 մարդ է զոհվել հակամարտության գոտում: