ՀՅԴ Բյուրոյի Հայ դատի և քաղաքական հարցերով գրասենյակի պատասխանատու Կիրո Մանոյանը լրագրողների հետ հանդիպման ժամանակ անդրադարձավ Ղարաբաղի հետ կապված վերջին զարգացումներին և հայ-թուրքական գործընթացին:
Մանոյանը նշեց, որ ԼՂՀ հարցի ներկայիս ակտիվությունը պայմանավորված է նրանով, որ 2012-2013 թվականները ընտրությունների տարի են Հայաստանի, Ադրբեջանի, ինչպես նաև Ռուսաստանի և ԱՄՆ-ի համար: Նա նկատեց, թե ակնկալիքները, որ մինչև տարեվերջ առաջընթաց կգրանցվի ԼՂՀ հարցում, անհիմն են. «Հակառակ միջնորդների ակտիվացման՝ մինչև տարեվերջ առաջընթաց չի կարող լինել՝ պայմանավորված Ադրբեջանի կեցվածքով, որը ցույց է տալիս, որ լավատես լինելու պատճառ չկա»:
Կիրո Մանոյանը նկատեց որ միջնորդների ակտիվությունը պայմանավորված է նաև նրանով, որ նվազեցնեն պատերազմի հավանականությունը. «Պատերազմի համար իրական հիմքեր չկան, քանզի եթե պատերազմ լինի, այն սկսելու է Ադրբեջանը։ Իսկ Ադրբեջանը հիմա պատաստ չէ դրան»:
Անդրադառնալով ԵԱՀԿ Մինսկի խմբի ձևաչափի փոփոխության վերաբերյալ խոսակցություններին՝ Մանոյանը նշեց, որ թե՛ Ռուսաստանը, թե՛ Ֆրանսիան, թե՛ ԱՄՆ-ն հավատարիմ են Մինսկի խմբի ձևաչափին։ Իսկ փոփոխություն կարող է լինել միայն, եթե Ղարաբաղը մասնակցի բանակցություններին, որի համար Հայաստանում պետք է աշխատանքներ տարվեն, ինչը դեռևս չի երևում:
Հայ-թուրքական գործընթացի հետ կապված՝ Մանոյանը ևս մեկ անգամ պնդեց, որ Հայաստանը պետք է ետ վերցնի իր ստորագրությունը արձանագրություններից, քանի դեռ Թուրքիան հետաքրքրված չէ Հայաստանի հետ հարաբերությունների հաստատմամբ: