Թուրքական Cumhuriyet թերթի փոխանցմամբ՝ Թուրքիայի Գլխավոր շտաբի արդեն իսկ նախկին պետ, բանակի գեներալ Սեբահաթթին Ըշըք Քոշաները մեկնաբանել է իր և ընդհանրապես բարձրագույն ռազմական ղեկավարության հրաժարականը՝ դա պայմանավորելով զինվորականների ձերբակալությամբ.
«Ներկայիս դրությամբ ձերբակալված զինվորականների թիվը կազմում է 250, որոնցից 77-ը պաշտոնաթող են։ Դրանց թվում են հայտնվել բազմաթիվ գեներալներ, ծովակալներ, սպաներ ու ենթասպաներ։ Այլևս անհնար էր հաշտվել այդ ապօրինությունների հետ։ Մամուլում ամեն տիպի կեղծիքների ու ստերի տարածման միջոցով հասարակական կարծիք են ձևավորում՝ զինված ուժերի ղեկավարությանը ներկայացնել որպես հանցախումբ»։
Հիշեցնենք, որ 2002 թվականի նոյեմբերին Թուրքիայում իր ղեկավարած «Արդարություն ու զարգացում» կուսակցության (ԱԶԿ) իշխանության գլուխ գալուց հետո Էրդողանն ամեն գնով պայքարում է զինվորականների ազդեցության նվազեցման ուղղությամբ և փայլուն հաջողություններ է արձանագրել տվյալ ոլորտում՝ այդ նպատակին ծառայեցնելով նաև ԵՄ կողմից պահանջվող արևմտյան բարեփոխումները (Եվրոպայում բանակն այնքան ազդեցություն չունի, ինչքան Թուրքիայում)։
Վերջին շրջանում Էրդողանն արդեն հաջողությամբ ձերբակալում է գործող ու պաշտոնաթող գեներալների, ինչի մասին ընդամենը 10 տարի առաջ Թուրքիայում չէին կարող անգամ երազել։ Ներկայումս ձերբակալության հերթական վտանգի տակ են 27-րդ Գլխավոր շտաբի պետ Քոշաներին նախորդած երկու Գլխավոր շտաբների պետեր՝ բանակի գեներալներ Յաշար Բույուքանըթն (25-րդ) ու Իլքեր Բաշբուղը (26-րդ)։
Ի դեպ, WikiLeaks-յան բացահայտումներում 2004 թվականով թվագրված փաստաթղթերից մեկում նշված էր, որ ԵՄ-ին Թուրքիայի անդամակցության բանակցություններից (03.10.2005) առաջ՝ 2004 թվականի դեկտեմբերին, Նիդեռլանդների արտգործնախարար Բեռնարդ Բոտը, ով այդ ժամանակ նախագահում էր ԵՄ-ը, Էրդողանի առջև պայման էր դրել դադարեցնել մարտական ինքնաթիռների թռիչքները ԵՄ անդամ Հունաստանի օդային տարածքով։ Սակայն Էրդողանը նրան պատասխանել էր, որ բանակը չի ենթարկվում իրեն, և ինքը չի կարող բավարարել այդ պահանջը։
