Թուրքական Vatan թերթի փոխանցմամբ՝ ավարտվել է ապրիլի 24-ին Բաթմանի Քոզլուք շրջանում ծառայող Սևակ Բալըքչըի սպանության հետաքննությունը։ Մեղադրող կողմը «միտումնավոր սպանության» համար պահանջում է մարդասպանին դատապարտել մինչև 9 տարվա ազատազրկման։
Հիշեցնենք, որ ապրիլի 24-ին հրազենով Սևակին «անզգուշաբար» սպանել էր նրա ծառայակից Քըվանչ Աղաօղլուն: Դրանից հետո պարզվեց, որ Աղաօղլուն ազգայնական է, ինչի մասին վկայում են Facebook սոցիալական ցանցում ազգայնական բնույթի նրա հրապարակումները:
Իսկ ահա Սևակ Բալըքչըի նշանած Մելանի Քումրույանի խոսքերով, սպանությունից մեկ ամիս առաջ զորամասում Սևակին սպառնացել են այրել. «Պարեկություն կատարելիս զինծառայողներից մեկը կորցրել է 50 թուրքական լիրա (ավելի քան 30 ամերիկյան դոլար), ինչի համար հրամանատարը մեղադրել է Սևակին ու նրա ընկերոջը և երկուսին ծեծի ենթարկել: Սևակը բողոքել էր հրամանատարի դեմ, սակայն սպառնալիքների ներքո ետ էր վերցրել իր բողոքը: Նրան սպառնացել էին այրել»:
Ի դեպ, նախքան սպանվելը, Սևակին մնացել էր ընդամենը 23 օր զորացրվելու համար։
