ՀՊՏՀ-ն ժամանակավորապես դադարեցնում է ուսումնական գործընթացը։
Հայաստանի պետական տնտեսագիտական համալսարանի կազմկոմիտեն հայտարարություն է տարածել, որում նշված է. «Ս.թ. հուլիսի 17-ին կայացած մրցույթում «ՀՊՏՀ» ՊՈԱԿ խորհրդի անդամների ձայների 2/3-ով ռեկտորի պաշտոնում ընտրվել է Դիանա Գալոյանը: «Բարձրագույն և հետբուհական մասնագիտական կրթության մասին» ՀՀ օրենքի 15-րդ հոդվածի 4-րդ կետի համաձայն՝ ՀՀ Կառավարությունը հաստատում է ռեկտորի ընտրության արդյունքները, ինչն ընտրությունից ավելի քանի երկու ամիս անց դեռևս չի իրականացվել»։
Արդյոք 6 հազար ուսանողների իրավունքների խախտում չէ՞ դասապրոցեսի դադարեցումը: ՀՊՏՀ ռեկտորի պաշտոնում ընտրված Դիանա Գալոյանը «Առաջին լրատվական»-ի հետ զրույցում, անդրադառնալով հարցին, նշեց, որ համալսարանի անձնակազմը շատ քաջ գիտակցում է այդ պատասխանատվությունը և պարտականություններն ուսանողների նկատմամբ, բայց ուզում է, որ լիազոր մարմինը, հիմնադիրը ևս գիտակցեն իրենց պատասխանատվությունը բուհի նկատմամբ:
«Տնտեսագիտական համալսարանի կոլեկտիվը անպայման լրացնելու է բաց թողնված դասերը: Վաղը նաև հանդիպում ունենք ուսանողների հետ՝ ստեղծված իրավիճակը պարզաբանելու համար»,-ասաց Գալոյանը՝ հավելելով, որ կոլեկտիվն ունի իրավունք բուհի զարգացման ռազմավարական երկարաժամկետ պլանավորում իրականացնելու, ինչն անհնար է իրականացնել առանց ընտրված ռեկտորի:
«Երկու տարի այդ պաշտոնը թափուր է որպես այդպիսին, որովհետև պաշտոնավարում են միայն ժամանակավոր պաշտոնակատարները: Այս պահին ռեկտորի ընտրությունը տեղի է ունեցել, և ողջամիտ բոլոր ժամկետները խախտված են: Երկու ամսից ավելի անցել է արդեն, սակայն նշանակումը տեղի չի ունենում, չկա նաև պարզաբանում, թե ինչու է պրոցեսը ձգձգվում: Դրա համար համալսարանի կոլեկտիվն իր միակամությունն արտահայտելու համար նման քայլի է գնացել»,- ասաց նա:
Գալոյանի խոսքով՝ դեռևս օգոստոսի վերջին ՀՊՏՀ գիտխորհուրդը դիմել է և՛ վարչապետին, և՛ ԿԳՄՍ նախարարին՝ պարզաբանելու, թե ինչու է ձգձգվում պրոցեսը, սակայն պատասխան չենք ստացել, նախօրեին էլ ողջ կոլեկտիվը հավաքվել է կառավարության դիմաց, այնտեղ խոստացել են 1-2 ժամվա մեջ պատասխանել, սակայն կրկին պատասխան չեն ստացել:
Արդյոք սրանով նաև գործադիրի՞ն են ուղերձ հղում. ի պատասխան հարցի նա նշեց, որ ռեկտորի հաստատումը, որպես այդպիսին, հիմնադրի գործառույթն է, և իհարկե, սա ուղերձ է հիմնադրին։
Հարցին, թե արդյոք ուսանողների շրջանում դիմադրություն չկա՞, որ դասերը հետաձգվել են, Գալոյանը պատասխանեց. «Իհարկե, կարող է լինել, ինչը նաև շատ ընդունելի է, որ պետք է որոշակի դժգոհություն լինի, քանի որ
դասապրոցեսը այս պահին խաթարված է: Մենք դա կլրացնենք, բայց ուսանողներն էլ պետք է հասկանան, որ բուհի մյուս շահառուները՝ դասախոսները, վարչական աշխատակազմը, ևս ունեն իրավունքներ, որոնց համար պետք է պայքարեն: Մենք փորձել ենք նամակների միջոցով ստանալ պարզաբանում, բայց չենք ստացել, և ստիպված ենք եղել գնալ այս պարտադրված քայլերին»: