Թուրքիայի արտգործնախարար Մևլութ Չավուշօղլուն Ֆրանսիայի նախագահ Էմանուել Մակրոնին մեղադրել է հիստերիայի մեջ։ Չավուշօղլուի խոսքով՝ Ֆրանսիայի նախագահը «հիստերիայի մեջ է ընկել» լիբիական և սիրիական հակամարտությունների զարգացման, ինչպես նաև Միջերկրական ծովի արևելյան սահմանների շուրջ վեճի պատճառով, գրում է Daily Sabah-ը։
«Ո՞վ է հրահրում Հունաստանին Թուրքիայի դեմ։ Ֆրանսիան։ Բայց նա այլ օրակարգ ունի։ Այն բանից հետո, երբ Սիրիայում ահաբեկչական պետություն ստեղծելու նրա ծրագրերը ձախողվեցին, նա հանդուգն դիրքորոշում ընդունեց (Թուրքիայի հանդեպ)։ Արդյոք ես պետք է թույլտվությո՞ւն խնդրեմ Ֆրանսիայից, երբ ահաբեկչության դեմ պատերազմ եմ մղում»,- հայտարարել է Չավուշօղլուն։
Ինչպես նշում է աղբյուրը, Թուրքիայի և Ֆրանսիայի միջև հարաբերությունները կտրուկ վատացել են Սիրիայում և Լիբիայում հակամարտությունների ֆոնին, ինչպես նաև Միջերկրական ծովի արևելյան հատվածում թուրք-հունական վեճի պատճառով։
Անկարան մեղադրում է Ֆրանսիային Լիբիայի ազգային բանակի առաջնորդ Խալիֆա Հաֆթարին աջակցելու համար, որը հանդես է գալիս Թուրքիայի կողմից վերահսկվող Տրիպոլիում Ազգային համաձայնության կառավարության դեմ:
«Լիբիայում ֆրանսիացիները աջակցեցին Հաֆթարին, որը լուրջ սխալ էր նրանց կողմից», – հայտարարել է Չավուշօղլուն։
Ըստ Չավուշօղլուի՝ Ֆրանսիան ամենից շատն է Հունաստանին սադրում Արևելյան Միջերկրածովյան տարածաշրջանում։ Նա Փարիզին կոչ է արել Անկարայի հետ համագործակցել տարածաշրջանային կայունության հասնելու համար:
Ոչ Մակրոնը, ոչ Ֆրանսիայի ԱԳՆ-ն դեռևս չեն արձագանքել Չավուշօղլուի հայտարարություններին։
