«Ես ուղղակի ուզում եմ շնորհավորել մեզ բոլորիս՝ և՛ Արցախի, և՛ Հայաստանի Հանրապետության, և՛ Սփյուռքի հայությանը այս հրաշալի, այս փառապանծ տոնի կապակցությամբ և ևս մեկ անգամ վերահաստատել, որ ինչպես 29 տարի առաջ Արցախի հայությունը և ողջ հայությունը հաստատակամորեն արտահայտեց իր կամքը՝ իրացնել իր ազատ ինքնորոշման իրավունքը և ապրել ազատ Արցախում, այսօր ևս ես ուզում եմ վերահաստատել բոլորիս այդ կամքը: Պետք է ամենօրյա ռեժիմով մեր լավագույն ջանքերը գործադրենք, որ աշխարհը ևս ճանաչի այդ ինքնորոշումը և արցախցիների ազատ ապրելու իրավունքը»,- Արցախի անկախության 29-րդ տարեդարձի կապակցությամբ Ստեփանակերտում «Առաջին լրատվական»-ի հետ զրույցում ասաց ՀՀ ԱԺ նախագահ Արարատ Միրզոյանը:
ԱԺ նախագահի խոսքով՝ արցախյան հիմնախնդրի շուրջ հայկական դիրքորոշման ներկայացումը ՀՀ ԱԺ խորհրդարանական դիվանագիտության թիվ մեկ առաջնահերթությունն է, և ցանկացած առիթ օգտագործվում է որևէ միջազգային գործընկերոջ Արցախ բերելու համար՝ տեղում իրավիճակին և արցախցիներին ծանոթացնելու նպատակով. «Ցավոք, կորոնավիրուսը այս հարցում ևս հսկայական խոչընդոտներ առաջացրեց: Հուսամ՝ առաջիկայում սա ևս կհաղթահարվի»:
Առավել մանրամասն՝ տեսանյութում:
