ՀՀ վարչապետ Նիկոլ Փաշինյանն աշխատանքային այցով օգոստոսի 29-ին Արցախի Հանրապետությունում էր։ Ստեփանակերտում տեղի է ունեցել ՀՀ վարչապետ Նիկոլ Փաշինյանի և ԱՀ նախագահ Արայիկ Հարությունյանի առանձնազրույցը: Արայիկ Հարությունյանը առանձնազրույցի ընթացքում հայտնել է, որ նախանշված է ոչ միայն այցելություն Զինված ուժեր, այլև տնտեսական խոշոր որոշ նախագծեր, որոնք համակարգաստեղծ նշանակություն ունեն ոչ միայն Արցախի տնտեսության, այլ նաև մեծ նշանակություն են ունենալու ընդհանուր Հայաստան աշխարհի, Հայաստանի Հանրապետության տնտեսության համար:
Նիկոլ Փաշինյանն ԱՀ նախագահ Արայիկ Հարությունյանի հետ այցելել է «Բեյզ Մեթըլս» ընկերության Կաշենի լեռնահանքային համալիր: Վարչապետն ու ԱՀ նախագահն ընկերության ղեկավարների ուղեկցությամբ շրջայց են կատարել համալիրում, ծանոթացել Կաշենի լեռնահանքային համալիրում իրականացվող աշխատանքներին, ընկերության գործունեությանն ու առաջիկա ծրագրերին:
Փաշինյանն ընդգծել է, որ մենք համատեղ շատ մեծ օրակարգ ունենք՝ սկսած Հայաստանի զինված ուժերի և Արցախի պաշտպանության բանակի բնականոն զարգացումից. «Իհարկե, մենք նաև որոշակի պարտավորություններ ենք ստանձնել Արցախում, տնտեսության, էներգետիկ ոլորտում ունենք բավականին լայն օրակարգ: Ցավոք, նոր տիպի կորոնավիրուսի համավարակը որոշակիորեն փոխեց տնտեսական տրամադրությունը, և մենք պետք է ավելի շատ ջանք գործադրենք, որպեսզի տնտեսական տրամադրությունը ոչ միայն վերադարձնենք նախահամավարակային շրջանին, այլև շատ ավելի բարձր նոտաներ հաղորդենք»։
Ի դեպ, սա Արայիկ Հարությունյանի երդմնակալությունից հետո վարչապետի Արցախ կատարած առաջին այցն էր։
Քաղաքագետ Ռոբերտ Ղևոնդյանը կարևորում է վարչապետի Արցախ կատարած այցն ու նշում, որ այն բավականին հագեցած օրակարգ ուներ: «Երկու կարևոր ուղղություն կա, առաջինը արտաքին քաղաքականն է, Հայաստանի և Արցախի իշխանությունների գործողությունների սինխրոնացման, շարունակական գործընթացը։ Մեկ անգամ չէ, որ խնդիրների ու մոտեցումների վերաբերյալ կարելի է ձևակերպել ընդհանուր օրակարգ ու դրանով առաջնորդվել։ Այն անընդհատ պետք է թարմացվի, հատկապես հուլիսյան իրադարձություններից հետո արտաքին քաղաքական դաշտում իրողություններ են փոխվել, ուստի Հայաստանի ու Արցախի իշխանությունների մոտեցումների սինխրոնացումը շատ կարևոր է»,- «Առաջին լրատվական»-ի հետ զրույցում ասաց նա։
Երկրորդ կարևոր ուղղությունը, ըստ քաղաքագետի, ներքաղաքական հարցերն են. «Տեսանք, որ Նիկոլ Փաշինյանի այցից առաջ այլ քաղաքական ուժեր էին մեկնել Արցախ, այլ հանդիպումներ են տեղի ունեցել, և նույնիսկ մի դեպքում հանդիպում տեղի չունեցավ։ Այդ ամենից հետո Նիկոլ Փաշինյանի այցը ներքաղաքական, ընդհանուր աշխարհաքաղաքական առանցքի ձևավորման հարցում շատ խորհրդանշական նշանակություն ունի»։
Միևնույն ժամանակ Ղևոնդյանն արձանագրում է՝ նախկին իշխանությունների օրոք Արցախի իշխանություններն ինքնուրույնություն չունեին. «Այսինքն՝ Արցախի սուբյեկտայնությունը, որի մասին շատ քաղաքական ուժեր մեծ-մեծ խոսում են, իրականում գոյություն չուներ։ Նախկինում Հայաստանն ամեն տեղ ներկայացնում էր Արցախը, և Արցախը առանձին քաղաքականություն իրականացնելու շատ սահմանափակ հնարավորություններ ուներ։ Հիմա շատ ավելի լավ է այն առումով, որ մի կողմից՝ Հայաստանի ու Արցախի միջև աշխատանքային հարաբերություններ են ձևավորվել, սակայն դա որևէ կերպ չի խաթարում Արցախի սուբյեկտայնությունը՝ թե՛ միջազգային ասպարեզում և թե՛ ներքաղաքական հարցերում։ Արցախն այսօր ի վիճակի է իր առանձին քաղաքական տարածությունն ունենալ ու այնտեղ քաղաքական հարցեր իրականացնել։ Իսկ նախկինում բոլորովին այլ էր, Արցախի քաղաքական գործընթացները արտացոլում էին Հայաստանում տեղի ունեցող քաղաքական գործընթացները, և առանձին գործընթացներ մենք շատ քիչ էինք տեսնում»,- եզրափակեց նա։
Արցախի նախագահ Արայիկ Հարությունյանի՝ արտաքին հարաբերությունների գծով խորհրդական Դավիթ Բաբայանը կարևոր է համարում երկու հայկական պետությունների սերտ համագործակցությունը բոլոր ոլորտներում: «Նման այցելությունները թույլ են տալիս, որպեսզի տեղում հստակեցվեն տարբեր ուղղություններով անելիքները, իրականացվող աշխատանքների ընթացքը, ու առհասարակ պահպանվի կայուն ու անմիջական կապ»,- «Առաջին լրատվական»-ի հետ զրույցում ասաց նա։
Մեր զրուցակիցը համոզված է՝ անկախ նրանից, թե ինչպիսի ներքաղաքական գործընթացներ են ծավալվում, Հայաստանի ու Արցախի միջև պետք է լինի սերտ համագործակցություն. «Հատկապես իշխանությունների, կառավարական տարբեր մակարդակներով կարևոր եմ համարում այդ համագործակցությունը։ Առհասարակ՝ քանի որ Արցախն ու Հայաստանը մեկ հայրենիք են, տվյալ դեպքում՝ դեռ երկու պետություն, այդ համագործակցությունը պետք է լինի առանց մեկը մյուսի կյանքին միջամտելու»։
