ԱՄՆ ազգային հետախուզության տնօրեն Ջոն Ռեթքլիֆը Fox News հեռուստաալիքի եթերում հայտարարել է, որ Չինաստանի կողմից սպառնալիքները շատ ավելի լուրջ են ռուսական սպառնալիքներից:
Ռեթքլիֆին խնդրել են մեկնաբանել նոյեմբերին կայանալիք ընտրություններում անվտանգության ապահովման հարցերով հետախուզության բանավոր ճեպազրույցների դադարեցումը՝ նախատեսված Կոնգրեսի համապատասխան հանձնաժողովների համար:
Ռեթքլիֆը նշել է, որ նման ճեպազրույցներից մեկից հետո մի քանի կոնգրեսականներ գաղտնի տեղեկատվություն են «տարածել» լրատվամիջոցներին՝ «կեղծ տպավորություն ստեղծելու համար, որ Ռուսաստանը ավելի մեծ սպառնալիք է ներկայացնում ազգային անվտանգության համար, քան Չինաստանը»:
«Ես չէի ցանկանա նվաստացնել Ռուսաստանին: Այն լուրջ վտանգ է ներկայացնում մեր ազգային անվտանգության համար, սակայն Չինաստանի կողմից սպառնալիքները շատ ավելի լուրջ են », – եզրափակել է Ազգային հետախուզական ծառայության ղեկավարը:
Ավելի վաղ ԱՄՆ նախագահ Դոնալդ Թրամփը ճեպազրույցների չեղարկումը բացատրել էր նրանով, որ ԱՄՆ կոնգրեսականները ստացված տվյալները փոխանցում են լրատվամիջոցներին: