Հայ ազգային կոնգրեսի կենտրոնական գրասենյակի ներկայացուցիչ, «Հայկական ժամանակ» օրաթերթի գլխավոր խմբագիր Նիկոլ Փաշինյանը, այսօր Մամուլի ազգային ակումբում պատասխանելով լրագրողների հարցերին, մասնավորապես իշխանություն-ընդդիմություն երկխության արդյունքում հնարավոր կոմպրոմիսին, խորհրդարանական ընտրությունների շուրջ համաձայնության գալուն, նկատեց. «Դուք ասում եք, եթե իշխանությունը ինչ-որ բան առաջարկի: Ես չեմ կարող չեղած առաջարկի վերաբերյալ մեկնաբանություն անել: Ես կարող եմ ասել, որ մեր դիրքորոշումը հետևյալն է՝ արտահերթ նախագահական ընտրությունների անցկացում հոկտեմբերին: Արտահերթ նախագահական ընտրությունները՝իշխանություններին անցնցում հեռանալու հնարավորություն տալը, արդեն շատ լուրջ կոմպրոմիս է»:
Լրագրողները հարց ուղղեցին Ն.Փաշինյանին իր այսօրվա թերթի խմբագրականի առիթով, որ եթե երկխոսությունը արդյունք չտա՝ կվերցնենք իշխանությունը գրոհով: Նա համեմատություններ տարավ Ազատության հրապարակը ժողովրդի կողմից վերանվաճելու փաստի միջև, երբ Կոնգրեսը, սպառված համարելով իրազեկումները Քաղաքապետրանին ներկայացնել, փաստեց, որ այդ «երկխոսությունն» իրեն սպառել է. «և ժողովուրդը գրոհով հասավ Ազատության հրապարակի պռնկին և իշխանությունը, հասկանալով, որ ոչինչ չի կարող անել ժողովրդի դեմ, բացեց Ազատության հրապարակի դռները: Ես ձեզ հավաստիացնում եմ, որ այս ճանապարհով բազմաթիվ դռներ կբացվեն»:
Այսինքն՝ նաև նախագահականի դռները կբացվե՞ն. «Երբ որ ժողովուրդը կանգնած լինի, այնպես, ինչպես կանգնած է մարտի 17-ին՝ցանկացած դուռ կբացվի՝ և՛ նախագահական, և՛ խորհրդարանական, և՛ երկուսը միասին: Ինձ համար որոշիչը քաղաքացիական ակտիվությունն է: Չկա այնպիսի ուժ, որը կարողանա դիմակայել քաղաքացիական ակտիվությանը, երբ որ քաղաքացիական ակտիվությունը կհասնի համապատասխան կետի, իշխանությունը,այսօր շատերը անհանվանական են համարում, այնպես, ինչպես անհանավանական էին համարում քաղբանտարկյալների՝մասնավորապես իմ և Սասուն Միքայելյանի ազատ արձակումը, այդ իշխանությունը շատ գիտակցված, խոհեմաբար կթողնի և կհեռնա: Խնդիրը հետևյալն է, որ Հայաստանի Հանրապետությունում սկսվել է իշխանափոխության գործընթաց: Թե ինչքան արագ տեղի կունենա այդ գործընթացը՝ կախված է բացառապես մի հանգամանքից՝ որքանով է ակտիվ ՀՀ քաղաքացին:»
Ն.Փաշինյանը հիշեցրեց, որ 2008 թ-ից հետո փորձում էին մեղադրել, թե իրենք զենք են ունեցել. «Եթե Սերժ Սարգսյանի լեզվով ասենք՝ մեր զենքը ժողովրդի վստահությունն է մեր պայքարի նկատմամբ, և այդ զենքով մենք կհաղթենք ցանկացած զենքի: Ժողովրդի դեմ խաղ չկա, եթե ժողովուրը մեզ վստահի և վստահությունը ցուցադրի Ազատության հրապարակում, ուրեմն մենք կկատարենք ժողովրդի տված ցանկացած պատվեր: Իշխանափոխությունը կամ հեղափոխությունը իրադարձություն չէ, գործընթաց է»:
Արդյոք իշխանությունը դարձյալ չի՞ կեղծի արտահերթ ընտրությունները, հարց ուղղեցին լրագրողները. «Այսօր Հայաստանը չի կարողանում հաղթահարել 2008 թ. նախագահական ընտրությունների կեղծումը: Եթե իշխանությունը կփորձի նոր ընտրություն կեղծել՝ արդեն որևէ երկխոսության, բանակցության մասին խոսք լինել չի կարող: Այսինքն, եթե իշխանությունը փորձի նորից ժողովրդին ծեծելով կեղծել, ուրեմն կծեծվի և կքշվի ժողովրդի կողմից»:
