Ռուսաստանն ու Ղազախստանը կառավարությունների մակարդակով համաձայնագիր են ստորագրել կորոնավիրուսի դեմ ռուսական պատվաստանյութի մատակարարման համար: Համաձայնագրով նախատեսվում է պատվաստանյութի երաշխավորված մատակարարում դրա փորձարկման բոլոր փուլերի ավարտից հետո:
Հայտնի է, որ Ռուսաստանն առաջին պետությունն է աշխարհում, որ հայտարարել է պատվաստանյութի գրանցման մասին՝ դա անելով նախագահի մակարդակով: Պուտինը հայտարարել էր անգամ, որ պատվաստանյութը փորձարկվել է նաև իր դստեր վրա, առանց որևէ հետևանքի:
Աշխարհում արդեն մի քանի ամիս ընթանում է կորոնավիրուսի դեմ պատվաստանյութերի մշակման աշխատանք, յուրօրինակ մրցավազք՝ Չինաստան, ԱՄՆ, Գերմանիա, Մեծ Բրիտանիա, այլ երկրներ: Ռուսաստանը փաստորեն գրանցման իմաստով առաջ է անցել բոլորից, թեև կան միջազգային կասկածներ ռուսական պատվաստանյութի արդյունավետության և վստահելիության տեսանկյունից: Առողջապահության համաշխարհային կազմակերպությունն ուսումնասիրում է ռուսական պատվաստանյութը:
Բայց Մոսկվան փաստորեն արդեն համաձայնություններ է ապահովում պատվաստանյութի առաքման իմաստով: Մասնավորապես, նախօրեին էլ հայտնի դարձավ, որ Պուտին-Լուկաշենկո հեռախոսազրույցի ընթացքում որոշվել է, որ Բելառուսը կլինի առաջին պետությունը, որ կստանա ռուսական պատվաստանյութը: Այն, որ Բելառուսում առկա բավականին թեժ քաղաքական վիճակի ֆոնին Պուտինն ու Լուկաշենկոն գտնում են պատվաստանյութի հարց քննարկելու ժամանակ և ցանկություն, վկայում է, որ պատվաստանյութի խնդիրը ոչ պակաս քաղաքական և աշխարհաքաղաքական է, և պատահական չէ, որ դրա վերաբերյալ պայմանավորվածություն է կայացվում հենց ներբելառուսական թեժ իրավիճակի ֆոնին: Դա առնվազն հարց է առաջ բերում՝ արդյոք Լուկաշենկոյի օգնության խնդրանքին ի պատասխան Պուտինը կարո՞ղ էր տալ հավանություն՝ պայմանով, որ կորոնավիրուսը ամիսներ շարունակ «անտեսած» Լուկաշենկոն պարտավորվի ստանալ ռուսական պատվաստանյութը Բելառուսի համար:
Հատկանշական է նաև, որ հաջորդիվ հայտնի է դառնում Ղազախստանի մասին: Արդյոք Մոսկվան պատվաստանյութի պայման է դնելու ԵՏՄ բոլոր երկրների՞ առաջ կամ գուցե ԱՊՀ երկրների՞ առաջ: Այդ իմաստով հարկ է սպասել, թե արդյոք այդ առնչությամբ նորություններ կլինե՞ն ռուս-ադրբեջանական դաշտում, որտեղ նախօրեին Շոյգուի այցն էր Բաքու, իսկ այսօր Ադրբեջանի արտգործնախարարի այցն է Մոսկվա:
Այդ ֆոնին էլ հատկանշական է, որ Հայաստանում հերթական բավականին թեժ տեղեկատվաքարոզչական շրջապտույտում է հայտնվել առողջապահության նախարարի հարցը, որը վարչապետի որոշումով մեկնել է արձակուրդ: