Boeing ընկերությունը վերանվանել է 737 MAX մոդելի ինքնաթիռը. այժմ օդանավը կոչվում է 737-8, չնայած որ նախկինում այդ անունն օգտագործվել է միայն պաշտոնական նամակագրությունում: Այս մասին հայտնի է դարձել լեհական Enter Air ավիաընկերության հետ չորս ինքնաթիռ ձեռք բերելու վերաբերյալ պայմանագիր կնքելուց հետո, գրում է The Guardian-ը:
Փորձագետները չեն բացառում, որ արտադրողը կարող էր շատ լավ զեղչ առաջարկել իր ամենասկանդալային ինքնաթիռի համար: Սա 737-8 մոդելի գնման առաջին նոր պայմանագիրն է՝ երկու ավիաաղետներից հետո, որի հետևանքով 346 մարդ զոհվեց:
Լեհական ավիափոխադրողի գլխավոր տնօրեն Գժեգոժ Պոլանիեսկին նշել է, որ խնդիրները լուծելուց հետո ինքնաթիռը բոլոր հնարավորություններն ունի լավագույնը դառնալու աշխարհում՝ երկար տարիներ: Enter Air-ի ղեկավարը հրաժարվել է նշել պայմանագրի պայմանները, այդ թվում նաև գինը, բայց նշել է, որ ընկերությունը շատ գոհ է գործարքից:
Հետաքննությունը ցույց է տվել, որ երկու աղետների պատճառն էլ եղել է օդանավի տեխնիկական թերությունները, դրա ծրագրակազմի հետ կապված խնդիրները և օդաչուների պատրաստման թերի ծրագիրը: Մոդելի առևտրային շահագործման թույլտվության տրամադրման ժամկետը դեռ հայտնի չէ:
