Ռուսական Infox.ru կայքի փոխանցմամբ՝ երեքշաբթի օրը Թուրքիայի Անթալիա նահանգի Ալանիա հանգստավայրում գրանցվել է ռուս զբոսաշրջիկների զանգվածային թունավորման դեպք։
Մոտ 100 ռուս զբոսաշրջիկ սննդային թունավորման ախտանիշներով դիմել են տեղի հիվանդանոցներ։ Բուժօգնություն ստանալուց հետո նրանցից մոտ 90-ը ազատ են արձակվել, սակայն 8 զբոսաշրջիկներ դեռ գտնվում են հիվանդանոցներում։
Ռուս զբոսաշրջիկների զանգվածային թունավորումը գրանցվել է Ալանիայի Club Günes Garden հյուրանոցում։ Դրանից հետո Թուրքիայի առողջապահության ու գյուղատնտեսության փորձագետները նմուշներ են վերցրել հյուրանոցի սննդից ու ջրից։
Հիշեցնենք, որ մայիսի վերջին Թուրքիայի Բոդրում հանգստավայրում Հյուսիսային Կիպրոսից բերված անորակ ալկոհոլից թունավորվել էին բազմաթիվ ռուս զբոսաշրջիկներ, որոնցի մի քանիսը մահացել էին։
Ի դեպ, 2011 թվականի առաջին կիսամյակին ռուս զբոսաշրջիկներին առնչվող ապահովագրական դեպքերի ու վճարված փոխհատուցման ծավալով արտասահմանյան երկրների ցանկը գլխավորել է հենց Թուրքիան։ Այս տարվա առաջին վեց ամիսներին Թուրքիայում ռուսների հետ գրանցվել է 3110 ապահովագրական դեպք, ինչի համար վճարվել է 11.8 միլիոն ռուբլի։
Երկրորդ տեղում Բուլղարիան է՝ 692 դեպք, իսկ երրորդ տեղում՝ Հունաստանը՝ 532 դեպք։
