Ինչո՞ւ է փոխհրաձգություն առաջացել ԿԳՄՍ-ի և «Մխիթար Սեբաստացի» կրթահամալիրի միջև: Թեմայի շուրջ «Առաջին լրատվական»-ը զրուցել է «Մխիթար Սեբաստացի» կրթահամալիրի հիմնադիր տնօրեն Աշոտ Բլեյանի հետ:
Հիշեցնենք՝ նախատեսվում է, որ այս տարվա սեպտեմբերի 7-ից՝ ՊՈԱԿ-ի մասին օրենքով, Աշոտ Բլեյանը պետք է ազատվի կրթահամալիրի տնօրենի պաշտոնից, քանի որ ՊՈԱԿ-ի մասին օրենքի համաձայն՝ 65 տարին լրանալուց հետո դադարեցվում է պաշտոնավարումը։ Աշոտ Բլեյանի խոսքով՝ «Մխիթար Սեբաստացի» կրթահամալիր-փորձարարական հետազոտական միավորումը դիմել է կառավարությանը, որպեսզի «Մխիթար Սեբաստացի» կրթահամալիրը պետական հիմնադրամ դառնա, այսինքն՝ ՊՈԱԿ-ը վերակազմավորվի «Մխիթար Սեբաստացի» կրթահամալիր պետական հիմնադրամի:
«Մեր 31 տարվա աշխատանքը հաշվի առնելով՝ կարող ենք ասել, որ ստեղծվել է բրենդ, ոչ նյութական արժեք հանրակրթության ոլորտում և դժվարություններով հանդերձ՝ հաջողել է ու մեծ նվաճումներ է ունեցել»,- նշեց Աշոտ Բլեյանը՝ հավելելով, որ նախարարությունը, հասկանալով հեղինակային մանկավարժության էությունը և հաշվի առնելով մեծ հաջողությունները՝ պետք է սիրաշահի իրեն և համոզի՝ չփոխել իր աշխատանքի ոլորտը:
Ինչո՞ւ է նախարարությունը խառնվել իրար… «Մխիթար Սեբաստացի» կրթահամալիրի՝ ՊՈԱԿ-ից պետական հիմնադրամ դառնալու մասին որոշումը բացառապես պետք է կայացնի կառավարությունը, սակայն ԿԳՄՍ նախարարությունը այդ վերակազմավորումը նպատակահարմար չի գտնում: «Կարևորն այն է, որ մենք ենք նպատակահարմար գտնում…»,- նշեց Աշոտ Բլեյանը՝ հավելելով, որ իրեն նոր աշխատանքի առաջարկ կարող է անել միայն համայնքը:
«ԿԳՄՍ նախարարը քիթ սրբելու ժամանակ չպետք է ունենար, փոխարենը զբաղված է համակարգը կառավարելի դարձնելով»,- ընդգծեց Աշոտ Բլեյանը:
Մանրամասն՝ տեսանյութում:
