Օգոստոսի 19-ին Հայաստանի չեմպիոն «Արարատ-Արմենիան» Երևանում Չեմպիոնների լիգայի խաղարկության որակավորման երկրորդ փուլում կմրցի Կիպրոսի չեմպիոն «Օմոնիայի» հետ։ Հիշեցնենք, որ կորոնավիրուսի համավարակի պատճառով որակավորման փուլի դիմակայությունները կայանալու են մեկ խաղով։ Այսինքն՝ հաղթանակի դեպքում «Արարատ-Արմենիան» կհայտնվի որակավորման երրորդ փուլում։ Նշենք, որ հայկական թիմերին երբևէ չի հաջողվել հաղթահարել որակավորման երկրորդ փուլի արգելքը։
Իսկ ինչպես կարելի է գնահատել մեր չեմպիոնի հնարավորությունները։ «Արարատ-Արմենիայի» ներկայիս վիճակը լավ որակելը բոլորովին ճիշտ չի լինի։ Հիշեցնենք, որ Բարձրագույն խմբի նախորդ առաջնության ավարտից հետո «Արարատ-Արմենիայից» հեռացավ գլխավոր մարզիչ Վարդան Մինասյանը։ «Արարատ-Արմենիայից» հեռացել են նաև առաջատար խաղացողներ Ռուժդի Աշենտեն, Գոռ Մալաքյանը, Դմիտրի Գուզը և Անտոն Կոբյալկոն։ Նշենք, որ Մինասյանը մեծ աշխատանք էր կատարել այս թիմում։ Առաջին անգամ մասնակցելով Հայաստանի առաջնությանը՝ «Արարատ-Արմենիան» դարձավ չեմպիոն և փայլուն ելույթ ունեցավ եվրագավաթների խաղարկությունում՝ դուրս գալով Եվրոպա լիգայի փլեյ-օֆ։ Վստահաբար կարող ենք ասել, որ Մինասյանի գլխավորությամբ «Արարատ-Արմենիան» ցուցադրում էր ամենաբալանսավորված խաղը։ Այս տարի երևանյան թիմը կրկնեց հաջողությունը՝ պահպանելով առաջին հորիզոնականը։ «Արարատ-Արմենիան» մոտ է նաև Հայաստանի գավաթը նվաճելուն և միայն հետխաղային 11 մետրանոցներով զիջեց «Նոային»։
Հիմա դժվար է պատկերացնել, որ «Արարատ-Արմենիան» նոր մարզչի՝ իսպանացի մասնագետ Դավիթ Կամպանյայի գլխավորությամբ կկարողանա գոնե կրկնել եվրագավաթներում նախորդ տարվա արդյունքը։ Իսպանացի մարզչի գլխավորությամբ «Արարատ-Արմենիան» անցկացրել է 2 պաշտոնական հանդիպում։ ՀՀ սուպերգավաթի մրցավեճում «Արարատ-Արմենիան» լրացուցիչ ժամանակում 2։1 հաշվով զիջել էր «Նոային»։ Հայաստանի 2020/2021 թթ. առաջնության առաջին տուրում էլ գործող չեմպիոնը ոչ-ոքի՝ 0։0 էր խաղացել «Ալաշկերտի» հետ։ Այսինքն՝ նոր մարզչի գլխավորությամբ «Արարատ-Արմենիան» ոչ մի հաղթանակ չի տարել և խփել է ընդամենը մեկ գնդակ, այն էլ՝ «Նոայի» պաշտպանի կոպիտ սխալի արդյունքում։ Ակնհայտ է, որ հատկապես առջևի գծում «Արարատ-Արմենիան» խնդիրներ ունի։ Այս վիճակում թիմը կներկայանա չեմպիոնների լիգայում։
Իսկ ինչ է իրենից ներկայացնում «Օմոնիան»։ Համավարակի հետևանքով Կիպրոսի առաջնությունը ժամանակից շուտ դադարեցվել էր։ Արդյունքում «Օմոնիան» ճանաչվել էր ժամանակից շուտ ավարտված առաջնության չեմպիոն։ Մասնավորապես, ՀՀ չեմպիոնի առաջիկա մրցակիցը վաստակել էր 46 միավոր և «Անորտոսիսի» հետ կիսում էր առաջին հորիզոնականը։ Լրացուցիչ ցուցանիշներով, սակայն, «Օմոնիան» գերազանցել էր «Անորտոսիսին»։
«Օմոնիայի» գլխավոր մարզիչը նորվեգացի ճանաչված մասնագետ Հենինգ Բերգն է։ Վերջինս որպես ֆուտբոլիստ հանդես է եկել «Մանչեսթեր Յունայթեդում», «Ռեյնջերոսում», ինչպես նաև Նորվեգիայի հավաքականում, որի կազմում անցկացրել է 100 հանդիպում։ Ըստ «Տրանսֆերմարկետի»՝ «Օմոնիայի» կազմի ընդհանուր արժեքը կազմում է 9.35 մլն եվրո, մինչդեռ «Արարատ-Արմենիայի» կազմի ընդհանուր արժեքը 5.43 մլն եվրո է։ «Արարատ-Արմենիայի» ամենաթանկարժեք ֆուտբոլիստը Սերգեյ Վակուլենկոն է՝ 400 հազար եվրո։ «Օմոնիայում» ամենաբարձր տրանսֆերային արժեքն ունի կենտրոնական պաշտպան Ադամ Լանգը՝ 800 հազար եվրո։ Այս ամռանը կիպրական «Անորտոսիսից» «Օմոնիա» է տեղափոխվել Սլովակիայի հավաքականի հարձակվող Միխալ Դուրիսին։ Վերջինս նախկինում հանդես է եկել նաև ռուսական «Օրենբուրգ» և Պլզենի «Վիկտորիա» ակումբներում։ Կենտրոնական հարձակվողի դիրքում են խաղում նաև Կիպրոսի երիտասարդական հավաքականի անդամ Անդրոնիկուս Կակոուլիսը և Կոստա-Ռիկայի հավաքականի հարձակվող Դավիդ Ռամիրեսը։
Կիպրական թիմն ունի նաև կորուստներ։ Թիմից հեռացել է լավագույն ռմբարկու Մետ Դերբիշայրին, իսկ ռումինացի դարպասապահ Պանտիլիմոնը վերադարձել է անգլիական «Նոթհինգեմ Սիթի»։ Պանտիլիմոնը նախորդ մրցաշրջանում վարձավճարով էր խաղում «Օմոնիայում»։ Թիմից հեռացել են նաև վենեսուելացի հարձակվող Միկու Ֆեդորը և կոլումբացի հարձակողական ոճի կիսապաշտպան Օրտեգան։ Նախապատրաստական փուլում «Օմոնիան» մի քանի ընկերական հանդիպումներ է անցկացրել՝ 0։3 հաշվով զիջելով Աթենքի «Օլիմպիակոսին» և 0։1 հաշվով՝ հունգարական «Զալաեգերսեգին։
Նշենք նաև, որ եվրագավաթների խաղարկությունում «Օմոնիան» արդեն մրցել է հայկական թիմի հետ։ 2016/17 մրցաշրջանում Եվրոպա Լիգայի առաջին որակավորման փուլում «Օմոնիան» հանդիպել էր Երևանի «Բանանցին»։ Երկու հանդիպումների արդյունքում «Օմոնիան» հաղթել էր 5:1 հաշվով։ Բուքմեյքերները «Արարատ-Արմենիա»-«Օմոնիա» դիմակայության ֆավորիտ են համարում կիպրական թիմին։ Վերջինիս հաղթանակի համար սահմանված է 1.96 գործակից, ոչ-ոքին գնահատված է 3.37, իսկ «Արարատ-Արմենիայի» հաղթանակը՝ 4 գործակցով։