Ամերիկյան Բլեքսմիթ ինստիտուտի հետազոտական խումբը հրապարակել է աշխարհի ամենակեղտոտ քաղաքների ցուցակը: Առաջին հորիզոնականներում են չինական, հնդկական և ռուսաստանյան քաղաքները: Այս մասին գրում է The Daily Telegraph-ը:
Այս ցուցակում առաջին երկու տեղերում չինական քաղաքներ են: Առաջինում Լինֆենն է, որտեղ ածուխ են արդյունահանում, իսկ տեղի բոլոր ձեռնարկություններն օգտագործում են ածուխը որպես հիմնական վառելիք: Տեղի բնակչության մեծ մասը տառապում է շնչուղիների հիվանդությամբ: Երկրորդում Տյանչժինն է, որտեղ արտադրվում է կապար, և օդում և ջրում դրա միջին նորման գերազանցվում է 10 անգամ, ինչը նույնպես ազդում է տեղի բնակչության, հատկապես` նորածինների առողջության վրա:
Երրորդ և չորրորդ տեղերում են հնդկական Սուկինդա և Վապի քաղաքները: Դրանցից առաջինում քրոմ են արդյունահանում, իսկ երկրորդում տեղակայված է 50 արդյունաբերական ձեռնարկություն, որոնք օդն աղտոտում են բազմաթիվ քիմիական նյութերով: Նշվում է, որ սնդիկի պարունակությունը ստորգետնյա ջրերում 100 անգամ գերազանցում է նորման:
Հինգերորդը պերուական Լա Օրոյա քաղաքն է, ուր մետաղարտադրության պատճառով կապարի պարունակությունը օդում և ջրում շատ մեծ է: Տեղի երեխաների արյան մեջ այն գերազանցում է նորման երեք անգամ:
Տասնյակում են ռուսական Նորիլսկն ու Ձերժինսկը, ուկրաինական Չեռնոբիլը, նաև՝ ադրբեջանական Սումգայիթ քաղաքը, որը զբաղեցնում է 9-րդ հորիզոնականը, քանի որ հայտնի է նավթարդյունաբերական հիմնարկներով, որոնք լուրջ ազդեցություն են ունենում էկոլոգիայի վրա: Տասնյակը եզրափակում է Զամբիայի Կաբվե քաղաքը, որը հայտնի է ցինկի և կապարի արտադրությամբ: Կապարի փոշին հաճախ ծածկում է հսկայական տարածքներ, իսկ երեխաների արյան մեջ այն գերազանցում է նորման 10 անգամ:
