Այս տարի հոկտեմբերին անցկացվելիք համապետական մարդահամարի նախապատրաստական աշխատանքներն ընթանում են ըստ ժամանակացույցի:
Ազգային վիճակագրական ծառայության (ԱՎԾ) մարդահամարի և ժողովրդագրության բաժնի պետ Կարինե Կույումջյանն «Առաջին լրատվականին» հայտնեց, որ այսօր Արմավիրի մարզում համայնքների ղեկավարների մասնակցությամբ տեղի է ունեցել ընդլայնված մարզային հանձնաժողովի նիստ, որի ժամանակ ներկայացվել է մարդահամարի կարևորությունը, առկա իրավիճակը, սպասվելիք աշխատանքների ընթացքը, համայնքների ղեկավարների հնարավոր աջակցությունը:
Կ.Կույումջյանը նշեց, որ ներկայումս քաղաքներում սկսվել են ցուցակագրման աշխատանքները, որոշ քաղաքներում դրանք կարվեն օգոստոսին. «Մինչև օգոստոսի վերջ տների, շինությունների ցուցակագրման աշխատանքները կավարտվեն, դրանց հիման վրա կձևավորվեն մարդահամարի տեղամասերը: Մշակվել են մարդահամարի անցկացման համար բոլոր մեթոդաբանական և հրահանգչական փաստաթղթերը, այդ թվում՝ մարդահամարի հարցաթերթը, որոնք ներկայացվել են վիճակագրության պետական խորհրդի հաստատմանը:
Կ.Կույումջյանի խոսքով՝ ֆինանսական խնդիրները դեռ ամբողջովին լուծված չեն: 5 տարվա կտրվածքով ամբողջ բյուջեն 6.7 մլն դոլար է, որի 25%-ը հատկացնելու է կառավարությունը, որը, բացի դրանից, մայիսի 21-ի որոշումով պահուստային ֆոնդից 100 մլն դրամ լրացուցիչ գումար է հատկացրել:
Միջազգային կառույցների հետ բանակցությունները շարունակվում են, մասնավորապես՝ ՄԱԿ-ի բնակչության հիմնադրամի, ՀԲ-ի, Նորվեգիայի, Իտալիայի, Շվեյցարիայի կառավարությունների և այլ դոնորների հետ:
Հիշեցնենք, որ ՀՀ կառավարության 2009 թ. մարտի 26-ի որոշմամբ ՀՀ-ում հերթական մարդահամարը կանցկացվի 2011 թ. հոկտեմբերի 12-21-ը ներառյալ:
