Հայաստանի նախագահ Արմեն Սարգսյանը ստորագրել է «Տեսալսողական մեդիայի մասին» օրենքը, որը բավականին աղմուկ էր բարձրացրել ռուսական հեռուստաալիքներին առնչվող իրողությունների համատեքստում։ Օրենքը նախատեսում է, որպեսզի Հայաստանի Հանրապետությունում օտարերկրյա հեռուստաընկերությունների՝ Հանրային մուլտիպլեքսով հեռարձակումը լինի միջպետական պայմանագրի հիմքով։ Այս կարգավորումը տարբեր շրջանակներ՝ թե՛ Ռուսաստանից, թե՛ Հայաստանի նախկին կառավարող համակարգից, մատուցեցին իբրև Հայաստանում ռուսական հեռուստաալիքների հեռարձակման արգելք:
Ռուսաստանի Ժուռնալիստների միության քարտուղար Շաֆիրը մտահոգիչ է համարում, որ Հայաստանում ուժի մեջ է մտել օրենք, որով Հանրային մուլտիպլեքսով արգելվում է օտարերկրյա հեռուստաընկերության հեռարձակում, եթե չկա դրա վերաբերյալ միջպետական պայմանագիր: Ըստ նրա՝ մտահոգիչ է լրագրողների աշխատանքի և իրավունքի սահմանափակման ցանկացած դեպք:
ԳԽ պատգամավոր Ազատ Արշակյանի կարծիքով՝ հիշյալ օրենքն արտոնությունների արգելման մասին է: «Արտոնյալ որևէ պետություն Հայաստանում քարոզչություն կատարելու իրավունք չունի։ Նրանք կարող են քարոզչություն կատարել հայկական պետության թույլտվությամբ։ Եթե կա երկիր, որը ֆոբիա ունի ժողովրդավարական արժեքների նկատմամբ, մարդատյաց հաղորդումներ է հեռարձակում՝ մանավանդ հայերի նկատմամբ, բնական է, որ մենք պետք է մեր քաղաքացիներին պաշտպանենք հոգեբանական և քաղաքական աղբից։ Օրենքը դրա մասին է, իսկ որ Ռուսաստանում և այլ երկրներում դժգոհ են՝ հասկանալի է, որովհետև զրկվում են մեր քաղաքացիներին մոլորեցնելու, զրպարտելու, հայհոյելու իրավունքից»,- «Առաջին լրատվական»-ի հետ զրույցում ասաց նա։
Ըստ Արշակյանի՝ կան այնպիսի պետություններ, որոնք կենցաղում խուլիգաններ են, բարեվարքության կանոնները խախտող պետություններ են: «Հասարակություններն էլ այդ պետություններում խտրականության կողմնակից են, չեն ճանաչում ՄԱԿ ժողովուրդների հավասարության, պետությունների հավասարության իրավունքը։ Դա նաև լյուստրացիա է, քաղաքական պետական խուլիգանները ինքնաբացահայտվում են։
Ձեր խոսքում մեջբերված պաշտոնյան էլ փաստորեն ասում է՝ ես ներկա եմ ատելության, մենք լավը չենք, մենք դաշնակից չենք, մենք բարեկամ չենք, մենք ժամանակակից չենք։ Ընդամենը դա են հայտարարում, իսկ օրենքը խիստ անհրաժեշտություն է, ցանկացած երկիր այդպիսի օրենք պետք է ունենա։ Մենք շատ ուշ հայտարարեցինք, որ նույնպես ունենք արժանապատվություն եթերում, տգեղ բաներից մեր եթերը անջատելու իրավունք ստացանք, ինքներս մեզ գռեհկությունից ազատ լինելու իրավունք տվեցինք»,-եզրափակեց մեր զրուցակիցը։
Քաղաքագետ Լևոն Շիրինյանը կարծում է, որ ցանկացած պետություն ունի անվտանգության բնական պահանջ: «Այդ բնական պահանջը ենթադրում է անվտանգության սպառնալիքների բացահայտում՝ զենք, զորք, մեդիա։ Հիմա որևէ երկիր, որն անկախ է, և ժողովուրդ, որ ուզում է իր ինքնությունը պահել, չի կարող իր երկիրը տրամադրել այլ երկրի ու լեզվի, Հայաստանը այդ իմաստով ռուսական մեդիադաշտի ազդեցության տակ է։ Տեսե՞լ ենք, որ հատկապես թավշյա հեղափոխությունից հետո, որը մեր ժողովրդի ինքնիշխան իրավունքն է, իշխանությունն էլ համահայկական ճիգերով է ձևավորել, Ռուսաստանից ինչ կատաղի թշնամանք կա… Ամեն մի քոսոտ վերլուծաբան օգտագործվում է Հայաստանի դեմ, Հայաստանի անվտանգության դեմ՝ Մարգարիտա Սիմոնով, Անդրանիկ Միհրանով, Ջորջ Միրզոյև, նաև իբրև թե հայերի կողմից սիրված ռուսական լրատվամիջոցների ներկայացուցիչներ՝ գողապետական լյութոկրատական իշխանության ներկայացուցիչները արշավ են սկսել Հայաստանի դեմ։ Ուստի յուրաքանչյուր ժողովուրդ ու պետություն պարտավոր է իր ինքնիշխանությունը պահել»,- «Առաջին լրատվական»-ի հետ զրույցում ասաց նա։
Մեր զրուցակցի կարծիքով՝ բնական է, որ կա հիվանդոտ ու ցավագին վերաբերմունք այդ ամենին. «Իրենք ինչո՞ւ են շահագրգռված, որ մնան այդ հեռուստաալիքները. որ շարունակեն իրենց կեղտոտ քարոզչությունը։ Բայց ես պնդում եմ՝ դրանք պետք է վերացվեն, ու օտար լեզվով հաղորդումները պետք է բացառապես սուբտիտրերով լինեն»։
