24-ժամյա ջրամատակարարումը հեռավոր երազանք չէ: Այսօր լրագրողների հետ հանդիպման ժամանակ հայտարարեց «Երևան ջուր» ՓԲԸ «Արևելք»-ի շահագործման տնօրեն Կարապետ Օհանյանը՝ ասելով, որ այդ ուղղությամբ աշխատանքներ են տարվում:
Կարապետ Օհանյանը մեկնաբանեց ամռան ամիսներին ջրամատակարարման անկման պատճառները՝ նշելով, որ շոգ եղանակներին կտրուկ ավելանում է ջրի սպառումը։ «Երևան ջուրն» ի վիճակի կլիներ պահանջարկը բավարարել, սակայն նրա սպասարկման տարածքի զգալի մասում ոռոգման ցանցի բացակայությունը հանգեցնում է նրան, որ քաղաքացիները կանաչ տարածքները ոռոգում են խմելու ջրով, ինչը խիստ բացասական է անդրադառնում համակարգի գործունեության վրա, հանգեցնում ջրի ճնշման անկմանը, վտանգում ժամանակացույցը: Կ.Օհանյանը նաև ընդգծեց, որ բաշխիչ ցանցում հաշվեկշիռը վերականգնելու, սպառողներին առնվազն հասանելիք նվազագույն ջրամատակարարմամբ ապահովելու նպատակով՝ ներկայումս տարվում են աշխատանքներ, միջոցներ են ձեռնարկվում ոչ միայն Երևան մղվող ջրի ծավալների ավելացման համար, այլև ջրամատակարարման ցանցի կատարելագործման, նոր ինժեներական լուծումներ գտնելու ուղղությամբ:
«Հասկանալի է, որ նշված ամառային խնդիրներից զատ, որոնք սեզոնային բնույթ են կրում, համակարգում առկա են այլ՝ ավելի խորքային խնդիրներ, որոնց լուծումը ոչ միայն զգալի ժամանակ են պահանջում, այլև միջոցներ: Ըստ հաշվարկների՝ Երևանի ջրամատակարարման և ջրահեռացման համակարգը ժամանակակից պահանջներին համապատասխանեցնելու համար անհրաժեշտ է մոտ 700 մլն ԱՄՆ դոլարի ներդրում»,- մեկնաբանեց Կ.Օհանյանը՝ տեղեկացնելով, որ «Երևան ջուրն» իր գործունեության ընթացքում համակարգում ընդամենը ներդրել է մոտ տասնյոթ մլն ԱՄՆ դոլար Համաշխարհային բանկի տրամադրած վարկից և 4.5 մլն դրամ՝ սեփական միջոցներից:
Անդրադառնալով Նոր Նորք վարչական շրջանի բնակիչների այն բողոքին, թե շրջանում ջրամատակարարման անկումը կապված է «Ջրաշխարհ» ժամանցային գոտու աշխատանքի հետ՝ ասաց, որ այդ կազմակերպությունն ունի սեփական հորը, որից ստանում է իր պահանջներին բավարար կոշտության ջուր և «Երևան ջուր»-ից շատ քիչ ջուր է սպառում: Կ.Օհանյանը նշեց մի քանի խնդիրներ, որոնց ուղղությամբ աշխատանքներ պետք է իրականացվեն՝ ջրամատակարարման անկման վերացում, ցանցի գոտիավորում, մաշվածության վերացում և բաշխիչ ցանցի խնդիրների վերացում:
