Սահմանադրական դատարանի փոփոխություններն ուժի մեջ մտնելուց հետո սկսկվել է դատարանի կազմը համալրելու գործընթաց: Կառավարությունը ներկայացրել է իր թեկնածուին, որի անվան շուրջ աղմկոտ քննարկումներ են ծավալվում: Ինչո՞ւ: Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ պատգամավոր, «Հանուն հանրապետության» քաղաքական նախաձեռնության հիմնադիր Արման Բաբաջանյանը, «Իրավաբանների հայկական ասոցիացիայի» նախագահ Կարեն Զադոյանը և փաստաբան Տիգրան Եգորյանը:
Արման Բաբաջանյանի կարծիքով՝ ՍԴ դատավորի պաշտոնում Վահրամ Ավետիսյանի առաջադրումը խայտառակություն է. «Չգիտեմ որքանով է վարչապետը տեղյակ եղել նրա գործունեությանը, որն անհամատեղելի է այն պաշտոնի հետ, որին նա հավակնում է… Կասկած չունեմ, որ այս թեկնածուն ՍԴ չի հասնելու՝ կա՛մ իր թեկնածությունը հետ կկանչի, կա՛մ ԱԺ քվեարկությամբ չի ընտրվի: «Իմ քայլ»-ի պատգամավորների հետ դեռ չեմ քննարկել այս հարցը, բայց հույս ունեմ, որ ողջամտությունը կհաղթի:
Այս գործընթացին զուգահեռ շատ ավելի լուրջ աշախատանք ունենք կատարելու՝ բացահայտելու համար այն անձանց, ովքեր ձեռնարկել են Վահրամ Ավետիսյանի առաջադրումը և, ըստ էության, հարվածի տակ են դրել ամբողջ գործընթացը և այն ջանքերը, որ մեկուկես տարի շարունակ գործադրվել են քիչ թե շատ նորմալ ՍԴ ունենալու համար: Մենք հիմա ճակատային կռիվ ենք տալիս թշնամու հետ, և ՍԴ խնդիրը ևս սահմանին հավասարազոր կարևորություն ունի: Սա պետության սահմանադրական անվտանգության հարցն է, մենք չենք կարող արդարադատության կարևորագույն գործառույթները վստահել այն մարդկանց, ովքեր մեծ կոմպրոմատային ժառանգություն ունեն, որը գալիս է իրենց ծնողներից. իրենք կյանքում որևէ վաստակ չունեն, ինչի հասել են, իրենց կոռուպցիոներ հայրերի օգնությամբ են հասել»: Պատգամավորը նաև հավելեց, որ Վ. Ավետիսյանի առաջադրումը ձեռնարկողները պետք է բացահայտվեն և չեզոքացվեն իշխանությունից, որպեսզի այլևս այսպիսի մարտահրավերների առաջ չկանգնեցնեն:
Կարեն Զադոյանի կարծիքով՝ ճիշտ կլիներ, եթե իշխանությունը ՍԴ դատավորի թեկնածու առաջադրելուց առաջ մրցութային կարգով ընտրեր նրան, և մրցույթի չափորոշիչները պետք է լինեն հստակ՝ ներառելով բարեվարքությունն ու պրոֆեսիոնալ կարողությունները, էթիկան, հաշվետվողականությունը…»:
«Նախորդ 20-25 տարիներին կարևորագույն պաշտոնները զբաղեցրել էին կեղծ, շինծու, ժողովրդավարական արժեքներից զերծ անձինք, ովքեր կերտել էին այդ համակարգը, և հենց նրանցից ազատվելու ցասումը հասունացավ ու 2018թ. առարկայացավ: Հիմա կառավարումը հանձնված է մի իշխանության, որն ունի գրեթե բացարձակ վստահություն, բայց դա բավարար չէ արդյունավետ լուծումներ ապահովելու համար… էֆեկտիվ և արժեքային կառավարման բացակայություն է այն, որ այսօր բերում և պարգևատրում են մեկին, ով, մեծ հաշվով, նորմալ է համարել և առանց վրդովմունքի արել է այն, ինչ տեղի է ունեցել նախորդ 20 տարիների ընթացքում…»,- ընդգծեց Տիգրան Եգորյանը:
Մանրամասն՝ տեսանյութում: