ԱԺ ԲՀԿ խմբակցության պատգամավոր Սերգեյ Բագրատյանը ԱԺ նախագահին տեղեկացրել է խմբակցությունից դուրս գալու որոշման մասին: Մամուլը դեռևս օրեր առաջ արձանագրել էր, որ Սերգեյ Բագրատյանը վերջին շրջանում բավականին պասիվացրել է իր աշխատանքը խմբակցությունում և չէր մասնակցում նաև նաև Գագիկ Ծառուկյանի պաշտպանության համար արվող ակցիաներին: Խմբակցությունից դուրս գալու մասին նրա դիմումը փաստորեն վկայում է այդ դիտարկման, այսպես ասած, իրավացիությունը:
Տեղի ունեցողը հետաքրքիր է իհարկե ներքաղաքական դաշտում ծավալված զարգացումների լայն համատեքստում: Հատկանշական է նաև, որ Սերգեյ Բագրատյանի դիմումի մասին հայտնի դարձավ նախօրեին հրապարակված տեղեկությունից հետո, ըստ որի՝ Կոռուպցիայի կանխարգելման հանձնաժողովը վարույթ է հարուցել Գագիկ Ծառուկյանի հարցով: Ըստ դիմումի, որի հիման վրա հարուցվել է վարույթը, Գագիկ Ծառուկյանն առերևույթ խախտել է պատգամավորի կարգավիճակի և բիզնեսի համատեղելիության արգելքը՝ մասնակցելով իր սեփականություն հանդիսացող կոնցեռնի կառավարման գործընթացին, ընդհանուր ժողովին և ստորագրելով արձանագրություն:
Նրա փաստաբանները հայտարարել են, թե չկա որևէ խախտում, բայց հարցը ԿԿՀ-ում է, և այն չափազանց պատասխանատու գործ է՝ հաշվի առնելով այն, որ խոսքը վերաբերում է Հայաստանում մշտապես աչքի ընկած և պարբերաբար շրջանառված ու փակված, այդ թվում՝ մեկ անգամ էլ հետհեղափոխական ժամանակաշրջանում փակված թեմայի՝ Ծառուկյանի բիզնեսի և քաղաքականության սերտաճման թեմային: Եվ հաշվի առնելով նաև այդ թեմայով հատկապես վերջերս տեղի ունեցած ներքին զարգացումներն ու վարչապետ Փաշինյանի կոշտ ելույթները՝ ԿԿՀ-ում թեմայի շոշափումն ու հերթական անգամ փակումը անկասկած բավականին տհաճ քաղաքական նստվածք կթողնեն կառավարող մեծամասնության հանրային վարկանիշի վրա:
Այդ համատեքստում արդյոք «կծիկը քանդվելու» որոշակի ցուցի՞չ է ԲՀԿ խմբակցության պատգամավորի դիմումը, թե՞ այն զուգադիպել է ԲՀԿ շուրջ զարգացումներին, գուցե պայմանավորված է նաև դրանցով, սակայն ավելի ներքին հարաբերությունների դրսևորում է և չի վերածվի ընդհանուր միտման:
Միևնույն ժամանակ, քաղաքական հանգամանքներից դուրս, բայց դրանց ծավալման ծիրում, պատգամավորի՝ ԲՀԿ խմբակցությունից դուրս գալու հանգամանքը անկասկած բավականին ուշագրավ է նաև ԲՀԿ նախագահի տան խուզարկության ընթացքում հայտնաբերված հայտնի երդմնագրերի իրողության ֆոնին, որ կային ԲՀԿ խմբակցության այլ ներկայացուցիչների անուններով:
