Երեկ մենք տեղեկացրել էինք, որ հայտնի երգչուհի Էմի Ուայնհաուսի մահից հետո կտրուկ ավելացել է նրա ալբոմների վաճառքը՝ մոտ 37 անգամ: Մարդիկ փորձում են գումար աշխատել այս ողբերգության վրա: Սակայն ամենամեծ գումարները ստացվել են բուքմեյքերական գրասենյակներում կատարված խաղադրույքների արդյունքում:
Ինչպես գրում են բրիտանական լրատվամիջոցները, մի շարք արևմտյան երկրներում խաղադրույքներ են ընդունվում ամենաանհեթեթ թեմաներով, կատարվում են մեծ գումարների խաղադրույքներ: Եվ ահա, իմանալով Էմի Ուայնհաուսի՝ թմրանյութերի և ալկոհոլի նկատմամբ ունեցած թուլության մասին, բուքմեյքերները խաղադրույքներ էին ընդունել Էմիի կյանքի երկարության վրա: Բոլոր նրանք, ովքեր խաղադրույք էին կատարել այն բանի վրա, որ Ուայնհաուսը կմահանա մինչև 30 տարեկանը, ստացել են անհավանական մեծ գումարներ:
Հայտնի է, որ մոտ 11 հազար բրիտանացի ավելի քան 600 միլիոն դոլարի գումար է ստացել բուքմեյքերներից:
