«Բոլորի համար էլ հասկանալի է, որ ատոմակայանը ռմբակոծել որևէ մեկը չի պատրաստվում. Ադրբեջանի պաշտպանության նախարարության այդ հայտարարությունը կարելի է հումորով ընկալել, սակայն մյուս կողմից էլ՝ սա փաստում է ադրբեջանական վերնախավում առկա լուրջ պրոբլեմների մասին, այսինքն՝ սա ցուցիչն է այն բանի, որ Ադրբեջանի էլիտան բավականին նյարդայնացած է:
Ես չեմ բացառում նաև, որ Էլմար Մամեդյարովի պաշտոնանկությամբ՝ Ալիևը չի սահմանափակվի, այլ սրան կհաջորդեն նաև Ադրբեջանի այլ պաշտոնատար անձանց պաշտոնանկություններ, ինչը նույնպես վկայում է Ադրբեջանում առկա ներքաղաքական ճգնաժամի մասին»,- «Առաջին լրատվական»-ի հետ զրույցում ընդգծեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը՝ անդրադառնալով Մեծամորի ատոմակայանին հրթիռային հարվածներ հասցնելու մասին Ադրբեջանի պաշտպանության նախարարության հայտարարությանը:
Այս համատեքստում հիշեցնենք, որ Ադրբեջանի վերոնշյալ հայտարարությանն արձագանքել էր ՀՀ վարչապետ Նիկոլ Փաշինյանը՝ մասնավորապես հայտարարելով.
«Սա մի հայտարարություն է, որն աներկբայորեն պետք է դիտարկվի որպես մարդկության դեմ հանցագործություն, որովհետև նմանատիպ գործողությունը մարդկության դեմ ուղղված ահաբեկչություն ձեռնարկելու սպառնալիք է և պետք է արժանանա համապատասխան միջազգային արձագանքի և հետաքննության: Մենք բոլորս պետք է ի վերջո դուրս գանք հրադադարի ռեժիմի խախտումների մասին շարունակական հայտարարությունների շրջապտույտից և պետք է հրադադարի ռեժիմի պահպանման վստահելի մոնիտորինգի միջազգային համակարգ ստեղծվի»:
Ինչ վերաբերում է վարչապետի այս հայտարարությանը, ապա Ալեքսանդր Իսկանդարյանը նշեց, որ սա 2016թ-ի Վիեննայի բանակցություններում Հայաստանի դիրքորոշման տրամաբանության շարունակությունն է, որին, սակայն, Ադրբեջանը երբեք չի համաձայնի:
Քաղաքագետի հետ զրույցում անդրադարձել ենք նաև հայ-ադրբեջանական պետական սահմանին՝ Տավուշի հատվածում, հուլիսի 12-ից մի քանի օր շարունակ Ադրբեջանի կողմից սանձազերծված ռազմական գործողությունների պատճառներին, հուլիսի 18-ին սահմանային իրավիճակի վերաբերյալ ՊՆ-ում վարչապետ Փաշինյանի, պաշտպանության նախարար Դավիթ Տոնոյանի, ԳՇ պետ Օնիկ Գասպարյանի և ԱԳ նախարար Զոհրապ Մնացականյանի գլխավորությամբ տեղի ունեցած խորհրդակցությանը և մի շարք այլ հարցերի:
Մանրամասները՝ տեսանյութում: