Կուբայի և ԱՄՆ-ի դիվանագիտական հարաբերությունների վերականգնման մասին հայտարարելուց հետո անցած հինգ տարիներին եղել է սոսկ ժամանակավոր ջերմացում, իսկ հարաբերությունները, ավելի շուտ, գտնվում են ազատ անկման վիճակում, այն կարող են կանգնեցնել Միացյալ Նահանգների նախագահական ընտրությունները, կարծում են փորձագետները, որոնք մասնակցել են ՌԻԱ Նովոստիի հարցմանը։ ԱՄՆ-ը և Կուբան 2015 թվականի հուլիսի 20-ին վերստին դեսպանատներ բացեցին միմյանց տարածքներում:
Մինչ այդ երկրների միջև դիվանագիտական շփումներն իրականացվում էին Վաշինգտոնում և Հավանայում Շվեյցարիայի դեսպանությունների միջոցով, որտեղ գործում էին երկու երկրների շահերի սեկցիաներ: Բազմամյա առճակատման ավարտվելն այն ժամանակ հնարավոր դարձավ ԱՄՆ-ի նախագահ Բարաք Օբամայի նոր քաղաքականության շնորհիվ, որը 2014 թվականի դեկտեմբերին հայտարարեց այդ ուղղությամբ ամերիկյան քաղաքականության վեկտորի սկզբունքային փոփոխության մասին:
ԱՄՆ-ի ներկայիս նախագահ Դոնալդ Թրամփը չսպասեց Վաշինգտոնի և Հավանայի միջև այդ պատմական համաձայնագրի երկրորդ տարելիցին և 2017 թվականի հունիսին հայտարարեց իր նախորդի «սխալ» քաղաքականության չեղարկման մասին: Սպիտակ տանը նշել են, որ ԱՄՆ-ը պահպանում է Կուբայի դեմ սահմանված Էմբարգոն և դեմ է հանդես գալիս դրա չեղարկման վերաբերյալ ՄԱԿ-ի և մյուս միջազգային կազմակերպությունների կոչերին:
