Հայ-ադրբեջանական սահմանին հրադադարի խախտման դեպք է գրանցվել. անցած գիշեր Ադրբեջանի հատուկջոկատայինները՝ շուրջ 100 հոգի, հերթական դիվերսիոն փորձն են ձեռնարկել «Անվախ» կոչվող դիրքի ուղղությամբ, մեր զինվորները կանխել են ներթափանցման փորձը, նախնական տվյալներով՝ հակառակորդն ունի զոհեր և վիրավորներ: Դիվերսիոն անհաջող փորձին հաջորդել է Տավուշի մարզի Մովսես, Ներքին Կարմիրաղբյուր, Չինարի, Այգեպար գյուղերի հրետակոծությունը, հայկական կողմում զոհեր և վիրավորներ չկան:
Թեմայի շուրջ քննարկմանը մասնակցեցին տեղեկատվական անվտանգության փորձագետ Սամվել Մարտիրոսյանը, քաղաքագետ, «Հանուն հանրապետության» քաղաքական նախաձեռնության անդամ Ռոբերտ Ղևոնդյանը և «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանը:
Հայ-ադրբեջանական սահմանին լարվածությունը շարունակվում է: Ինչու է Ադրբեջանը տաք պահում Տավուշի ճակատը: «Ադրբեջանի իրական կռիվը ոչ միայն Արցախի հետ է, այլ հայության: Ինչ վերաբերում է սահմանի այդ հատվածին, կարծում եմ, Ադրբեջանի համար սիմվոլիզմը միշտ է համարվել արտաքին քաղաքականության գործոն, և այն, որ Հայաստանի առաջնորդը ներկայացնում է այդ մարզը, դա նույնպես իր դերն է խաղում: Բացի դրանից՝ այդ հատվածում եթե Ադրբեջանը ցանկանար որոշակի գործողություններ իրականացնել, ապա աշխարհագրական ռելիեֆի առումով նպաստավոր դիրքում էին, երբ դեռ բարձունքը իրենցն էր, որտեղից կարողանում էին վերահսկել հայկական գյուղերը: Չստացվեց այն, ինչ նրանք պլանավորել էին, իրադրությունը կտրուկ փոխվեց»,- նշեց Ռոբերտ Ղևոնդյանը:
Այս իրադարձություններին նախորդեց Ադրբեջանի տեղեկատվական արշավը: Վահագն Ալեքսանյանի խոսքով՝ այդ հռետորաբանությունը Ադրբեջանը պահպանում է տարին տասներկու ամսին և չի դադարում:
Սամվել Մարտիրոսյանը նշեց, որ հունիսից սկսած՝ կիբերտիրույթում Ադրբեջանի ակտիվությունը մեծացել էր. «Տեղեկատվական ոլորտում փորձարկում էին իրավիճակը՝ տեսնելու կորոնավիրուսի համավարակով պայմանավորված իրավիճակն ինչպես է ազդել մեր մարտունակության վրա»: Տեղեկատվաան փորձագետի դիտարկմամբ՝ Բաքուն պատրաստ չէ երկարատև պատերազմի, և նրա հարձակումներն ուղղված են մեր մարտունակությունն ստուգելուն:
«Տեղեկատվական ոլորտում հարձակումներ են իրականացվում, ահռելի քանակով ֆեյքեր են հայտնվել, ահաբեկման մեթոդներ են կիրառում»,- նշեց Սամվել Մարտիրոսյանը՝ հավելելով, որ պետք է սրան ասիմետրիկ պատասխան տալ: Ռոբերտ Ղևոնդյանը նկատեց, որ հայկական կողմը կարողանում է դիմագրավել և չեզոքացնել ադրբեջանական ֆեյքերի տեղեկատվական հարվածները»:
«Մենք պատերազմական վիճակում ենք, բայց Հայաստանից հնչում են դավաճանական տեքստեր»,- ընդգծեց Վահագն Ալեքսանյանը: Ռոբերտ Ղևոնդյանը հավելեց, որ շահարկումներ են արվում, և դրանք խոր արմատներ ունեն: Այս օրերին, երբ կա արտաքին վտանգ, պետք է համախմբվել:
Սամվել Մարտիրոսյանը հավելեց, որ քաղաքական գործիչները պետք է ճիշտ գնահատեն իրավիճակը և գիտակցեն, որ այս իրավիճակում հնարավոր չէ քաղաքական դիվիդենտներ հավաքել: Ռոբերտ Ղևոնդյանի դիտարկմամբ՝ որոշ շրջանակներ այս օրերին ևս փորձում են վնաս հասցնել իշխանության հեղինակությանը և փորձել իշխանության հայտ ներկայացնել. «Պետք է ուշադիր լինել, որ այդպիսի հակապետական գործողությունը հաջողություն չունենա Հայաստանում»:
Մանրամասն՝ տեսանյութում: