ԱԺ ՀՅԴ խմբակցության պատգամավոր Արծվիկ Մինասյանը, «Առաջին լրատվական»-ի հետ զրույցում անդրադառանալով Հայ Ազգային Կոնգրես – իշխանություն երկխոսության երկրորդ փուլում համաձայնեցված երկխոսության օրակարգին, նշեց. «Արտահերթ ընտրությունները ավելի շատ ձև են, ոչ թե բովանդակություն, իսկ կոալիցիայի նախապատրաստությունը ընտրություններին, որի շուրջ պետք է նաև Կոնգրեսը հանդես գա համապատասխան առաջարկներով, կարծում եմ, ոչինչ չփոխող մոտեցում է, քանի որ մի քանի ամիս առաջ, երբ խորհրդարանական ընդդիմությունն էր հանդես գալիս նույն ընտրական օրենսդրության մեջ բարեփոխումներ իրականացնելու առաջարկով, Կոնգրեսը պասիվ դիրք գրավեց և անգամ փորձ չարեց պաշտպանելու այդ առաջարկները»։
Հարցին, թե իշխանության կողմից Կոնգրեսի մինչ այս առաջարկած պահանջների բավարարումը թույլ տալի՞ս է ենթադրելել, որ արտահերթ ընտրությունների պահանջն էլ իշխանությունը կբարարարի, Արծվիկ Մինասյանը պատասխանեց.
«Արտահերթի մասին խոսելիս նախ պետք է հասկանանք, թե դրա համար ինչ ռեսուրսներ են դրված սեղանին։ Կոնգրեսի կողմից առաջարկվող ռեսուրսները համահունչ չեն այդ առաջարկին, և իշխանությունը, ակնհայտ է, որ այս պայմաններում չի գնա արտահերթ ընտրությունների, բացառությամբ մեկ-երկու դեպքի, քանի որ ներկա խորհրդարանական մեծամասնությունը իրեն ձեռնտու է, և նաև ձեռնտու քաղաքական համակարգում ոչ մեծ արտախորհրդարանական ուժի դիմադրությունը։
Թե որոնք են այն բացառիկ դեպքերը, որոնց դեպքում կլինեն արտահերթ ընտրություններ, Ա.Մինասյանը մանրամասնեց.
«Ռուսաստանի ընտրությունների հետ կապված իրավիճակը. այնտեղ կարող են այնպիսի զարգացումներ լինել, որ ձեռնտու լինի էստեղ արտահերթ ընռրություններ անցկացնելու համար, և երկրորդ՝ ղարաբաղյան հարցը։ Բոլոր դեպքերում, այսօրվա հանդիպումը ցույց տվեց, որ երկու կողմն էլ, ըստ էության, իրենց համար օրակարգային հարց չեն դարձնում երկրում ստեղծված սոցիալ-տնտեսական վիճակը փոփոխելու, աղքատության հաղթահարման հարցը։ Սա է, որ մեր քաղաքացիներին մղում է դրսում կենսամակարդակը որոնելուն»։
«Առաջին լրատվական»-ի հարցին, թե իրենց քաղաքական ուժի մասնակցությունը այս գործընթացին տեսնու՞մ է արդյոք, և եթե այո, ապա ինչ ձևաչափով, ՀՅԴ պատգամավորը հայտնեց.
«Իմ սուբյեկտիվ կարծիքն է, որ իրատեսական չէ, մյուս կողմից էլ նպատակային չէ, քանի որ երբ խոսվում է երկխոսության մասին, նշանակում է, որ երկուսն են իրար հետ քննարկում։ Եթե լինեին հրապարակային քննարկումներ, որը մենք առաջարկել ենք իշխանություններին ուղղված բազմաթիվ կոչերում, երբ առաջարկում էինք նոր ռազմավարություն մշակել, ձևավորել նոր հարկային զարգացում ապահովող հարկային կառավարություն, այդ դեպքում հնարավոր կարող էր համարվել, բայց այս փուլում և այս ձևաչափով, կարծում եմ՝ ոչ»։
