Վերջին օրերին ցավոք սրտի սահմանին լարվածությունը բավականին բարձրացել էր, քանի որ վերսկսեցին ռազմական գործողությունները Տավուշի տարածաշրջանում, հատկապես Չինարիի հատվածում: Այս մասին «Առաջին լրատվական»-ի հետ զրույցում նշեց Տավուշի մարզի Չինարի համայնքի ղեկավար Սամվել Սաղոյանը:
«Եթե երեկ նաև այսօր մինչև ժամը 12-ը կային փոխհրաձգություններ հենակետերում, դիրքային կրակոցներ, ապա ցավոք սրտի, դրանից հետո ադրբեջանցիները տեսնելով իրենց անկարող վիճակը, իր դավադիր զենքն ուղղեց խաղաղ բնակչության վրա: Ժամը 14-ի սահմաններում 8 արկ արձակվեց գյուղի ուղղությամբ խոշոր տրամաչափի ականանետերով՝ 80-200 միլիմետրանոց տրամաչափի»,-ասաց գյուղապետը:
Նա հավելեց, որ 31 տարի ապրում են պատերազմական իրավիճակում, և փառք ու պատիվ փոքրից մինչև մեծ, բոլորը գիտեն պաշտպանվելու կանոնները. «Քաղաքացիական պաշտպանությունը լավ է կազմակերպված, մանկապարտեզից սկսած ուսուցողական դասընթացներ ենք անցկացնում, և սահմանին ապրող յուրաքանչյուր քաղաքացի գիտի՝ որ զենքի տեսակից ինչպես պաշտպանվել: Փառք Աստծո, մենք այս դեպքում՝ ոչ մի մարդկային կորուստ չունենք: Երկու տուն է վնասվել, եմի պատը քանդվել է, արկը չի պայթել, իսկ երկրորդում պայթյունից վնասվել են պատուհանները, պատուհանները: Այդ պահին տանը եղել են 7-8 հոգի, այդ թվում երեխաներ, բայց Փառք Աստծո մարդկային վնաս չունենք»,-ընդգծեց Սաղոյանը: