Ադրբեջանական Salam News գործակալությանը տված հարցազրույցի ժամանակ ադրբեջանցի քաղաքագետ Վաֆա Գուլուզադեն հայտարարել է, որ Թուրքիայի վարչապետ Ռեջեփ Թայյիփ Էրդողանի վաղվա ադրբեջանական այցի ժամանակ անխուսափելի է ղարաբաղյան հակամարտության կարգավորման քննարկումը.
«Թուրքիան Ադրբեջանի համար բարեկամական ու եղբայրական երկիր է, և նրանք մշտապես քննարկում են տվյալ հարցը։ Էրդողանը չի կարող կարգավորել ղարաբաղյան հակամարտությունը, քանի որ այստեղ գոյություն ունի Ռուսաստանի գործոնը։ Դրա համար էլ Թուրքիայի ուժերից վեր է այդ հարցի լուծումը։ Թուրքիան չի ցանկանում բախվել Ռուսաստանի հետ։
Ներկայումս Թուրքիան միլլիարդավոր եկամուտներ է ստանում ռուս զբոսաշրջիկներից, Ռուսաստանի հետ առևտրից։ Թուրքիան զարգանում է Ռուսաստանի հաշվին։ Տարեկան Թուրքիա է այցելում ավելի քան երկու միլիոն ռուս զբոսաշրջիկ»։
Գուլուզադեն նաև մեկնաբանել է Ադրբեջանում ԱՄՆ դեսպան Մեթյու Բրայզայի այն հայտարարությունը, որում նա Բաքվում գտնվող հայկական եկեղեցու վերաբացման հույս է հայտնել. «Ադրբեջանում հայկական եկեղեցին կարող է բացվել միայն այն ժամանակ, երբ խաղաղ ճանապարհով կկարգավորվի ղարաբաղյան հիմնախնդիրը։
Մեթյու Բրայզան տեղյակ է, որ ինչ-որ պահի խաղաղություն է հաստատվելու, իսկ հետո բարելավվելու են բոլոր կապերը։ Դրանով Բրայզան ցույց է տվել, որ խաղաղության պայմանագիր Ադրբեջանի ու Հայաստանի միջև երբևէ կկնքվի։ Դրանից հետո երկու երկրներում կարող են բացվել և կառուցվել մզկիթներ ու եկեղեցիներ»։
