Ադրբեջանական ANS PRESS-ի փոխանցմամբ՝ Ադրբեջանում գտնվող Լեհաստանի նախագահ Բրոնիսլավ Կոմորովսկին, պատասխանելով լրագրողների հարցերին, անդրադարձել է ղարաբաղյան հակամարտության կարգավորմանը.
«Խնդիրը պետք է լուծեն բացառապես հակամարտող կողմերը։ Մենք, բնականաբար, հանդես ենք գալիս հակամարտության շուտափույթ կարգավորման օգտին։ Մենք ցանկանում ենք, որ հակամարտությունը վերացվի, կարգավորվի, որպեսզի այդ տարածաշրջանի ժողովուրդներն արժանիորեն ապրեն հանդարտ պայմաններում։
Մենք գիտենք, թե որքան կարևոր է տարածքային ամբողջականության հարցը, սակայն միևնույն ժամանակ կարևոր է նաև ժողովուրդների ինքնորոշման հարցը։
Լեհաստանն այդ պլանում ցավալի փորձ ունի։ Տեղի են ունեցել մի շարք գործընթացներ, որոնք վնասել են Գերմանիայի, Ռուսաստանի, Ուկրաինայի հետ մեր հարաբերություններին։ Սակայն մենք հաջողությամբ հաղթահարեցինք այդ պատմական դժվարությունները»։
Հիշեցնենք, որ Կոմորովսկին Լեհաստանի 9-րդ նախագահ է ընտրվել 2010 թվականի օգոստոսի 6-ին՝ այդ պաշտոնում փոխարինելով Սմոլենսկի մոտ տեղի ունեցած ավիաաղետի հետևանքով զոհված Լեհ Կաչինսկուն։ Կոմորովսկին Ադրբեջան է ժամանել հուլիսի 25-ին, իսկ այսօր նա ժամանել է Վրաստան։
