Նախկինում ճաշելու համար մարդն օգտագործում էր մեկ ժամ: Սակայն ինչպես ցույց են տվել հետազոտությունները, այժմ երբ ճնշումը տանն ու աշխատանքի վայրում շատ մեծ է, մարդիկ սնվելու համար օրական օգտագործում են ընդամենը 39 րոպե: Այսպես, չնայած աշխատանքի վայրում կա մեկժամյա ընդմիջում, սակայն մարդիկ արագ ուտում են սենդվիչները հենց աշխատավայրում: Դրա համար նրանք ծախսում են 12 րոպե և 49 վայրկյան, գրում է The Daily Mail-ը:
Նախաճաշն իր հերթին ավելի արագ է տևում: Այն ձգվում է 7 րոպե և 20 վայրկյան: Ճաշը տևում է 19 րոպե: Արդյունքում մենք ստանում ենք 39 րոպե 9 վայրկյան: Երբեմն մարդիկ այնքան զբաղված են, որ բաց են թողնում ճաշը: Նման դրսևորումները նկատվում են ավելի շատ կանանց մոտ, քան` տղամարդկանց: Մասնագետները նշում են, որ հիմա սնունդը դարձել է ֆունկցիոնալ զբաղմունք հասուն մարդկանց երեք քառորդի մոտ: Նրանք այնքան արագ են սնվում, որ անգամ չեն կարողանում այն վայելել կամ զգալ նրա համը: 45%-ն այնքան զբաղված է, որ չի զգում՝ արդյոք կշտացե՞լ է, թե՞ ոչ: Դա նպաստում է շատ ուտելուն:
President պանիր արտադրող ընկերության մասնագետները պարզել են, որ հենց լարվածության պատճառով էլ մարդիկ նման կերպ են սնվում: Հարցվածների 78%-ը նշել է, որ կուզեր քիչ ավելի երկար ժամանակ տրամադրել սնվելուն: Հարցվածների տասից ինը նշել են, որ իրենք չեն կարողանում մասնակցել ընտանեկան ընթրիքին, սակայն այդ փորձն իրենց դուր է գալիս: Նախաճաշի ընթացքում հեռուստացույց է դիտում հարցվածների 31%-ը, ճաշի ընթացքում` 53-ը: Հոգեբան բժիշկ Ռիչարդ Վուլֆսոնի խոսքերով, հիմա մարդն ապրում է մի հասարակության մեջ, որը մեծամասամբ միտված է սնվելու: Մենք ունենք աստղային խոհարարներ և խոհարարական բազմաթիվ գրքեր: Միևնույն ժամանակ, մարդիկ ժամանակ չունեն, որպեսզի նորմալ սնվեն: Դա էլ ազդում է մարդկանց էմոցիոնալ վիճակի վրա:
