Քաղաքական գործիչ, դիվանագետ, ԼՂՀ արտաքին գործերի նախկին նախարար Արման Մելիքյանը, մեկնաբանելով Եվրամիության՝ ընդարձակման և Արևելյան գործընկերության քաղաքականության գծով հանձնակատար Շտեֆան Ֆյուլեի խոսքերն այն մասին, թե Եվրամիությունը ուզում է մեծացնել իր ներգրավվածությունը ղարաբաղյան խնդրում և պատրաստ է անհրաժեշտ ֆինանսական միջոցներ տրամադրել կարգավորմանը նպաստելու և տարածաշրջանը վերականգնելու համար, «Առաջին լրատվական»-ի հետ զրույցում ասաց, որ ամեն ինչ կախված է նրանից, թե ինչին ուղղված կլինեն ֆինանսական այդ միջոցները։
«Առ այսօր ևս եվրոպական տարբեր կազմակերպություններ ու կառույցներ ֆինանսավորում էին տարբեր նախագծեր, որոնք ուղղված էին փոխվստահության մթնոլորտի հաստատմանը Հայաստան-Արցախ-Ադրբեջան եռանկյունու շրջանակում»,- ասաց Ա.Մելիքյանը՝ ավելացնելով, որ դրանք, ըստ էության, աշխատել են հօգուտ այն բանի, որ ցույց տրվի, թե հակամարտությունը ընթանում է Հայաստան-Ադրբեջան ձևաչափով։
«Եթե այս նույն տրամաբանությամբ ֆինանսավորում պետք է իրականացվի, դա ուղղված կլինի Արցախի անկախության ճանաչման դեմ։ Ֆինանսավորման մասին բոլոր խոսակցությունները տեղավորվում են ներկայիս բանակցային գործընթացի տրամաբանության ու օրակարգի շրջանակում»,- ընդգծեց նա՝ հավելելով, որ եթե այդ տրամաբանությունը չփոխվի, դա «կշարունակի աշխատել մեր դեմ»։
Նրա խոսքով՝ այլ հարց է, որ կարծես միտումներ են նշմարվում, միջնորդներն են նոր նախաձեռնությամբ հանդես գալիս զուտ տեղեկատվական-քաղաքական մասով։ Որպես օրինակ՝ նա բերեց «Վաշինգթոն Փոսթի» Արցախին նվիրված հոդվածաշարը, ԱՄՆ Կոնգրեսի որոշումը Թուրքիայում քրիստոնյաների սեփականության առնչությամբ։
«Որոշ նոր շեշտեր են առաջ եկել, որ թույլ են տալիս մտածել, թե գուցե բանակցային տրամաբանության և օրակարգի շրջանակներում նորամուծություններ տեղի կունենան։ Ժամանակ է հարկավոր, որպեսզի հասկանանք, թե որոնք են միտումները»,- խոսքը եզրափակեց Ա.Մելիքյանը։
