Հայ ազգային կոնգրեսի հետ երկխոսելու նպատակով ստեղծված իշխանական պատվիրակությունն այսօր ԱԺ-ում խորհրդակցություն է անցկացրել, սակայն չի շտապում մանրամասներ հաղորդել՝ առաջարկելով սպասել վաղվան:
ԱԺ ԲՀԿ-ական պատգամավոր Նաիրա Զոհրաբյանը մեզ հետ զրույցում նշեց, որ կոռեկտ չի համարում մանրամասներ հաղորդել խորհրդակցությունից , քանի որ եթե այդ մասին հարկ համարեր՝ կխոսեր աշխատանքային խմբի ղեկավար Դավիթ Հարությունյանը, հետևաբար՝ ճիշտ չի համարում մինչև վաղվա հանդիպումը հրապարակել, թե իրենք ինչ հարցեր են պատրաստվում ներկայացնել ՀԱԿ-ի հետ քննարկմանը: «Կարող եմ ասել հարցերի բավականին լայն սպեկտր է քննարկվել, և ես հույս ունեմ, ավելին՝ ակնկալում եմ, որ վաղվա աշխատանքային նիստերի ընթացքում կփորձենք սկսել ձևավորել միասնական փոխզիջումային օրակարգ: Ավելին ասելը ճիշտ չեմ համարում»,- սահմանափակվեց աշխատանքային խմբի անդամ Նաիրա Զոհրաբյանը:
Մեր այն դիտարկմանը, թե խորհրդակցության ընթացքում ՀԱԿ-ի առաջ քաշած արտահերթ ընտրությունների հարցը քննարկվե՞լ է՝ պատասխանեց. «Օրակարգում մենք նման խնդիր չունենք, բայց եթե մեր ՀԱԿ գործընկերները ասում են, որ իրենց օրակարգում նման խնդիր իրենք ունեն, մենք ասելու ենք, որ տաբուներ չկան, ցանկացած հարց կարող է քննարկվել: Իրենք կարող են իրենց դիրքորոշումը ներկայացնել, մենք էլ կարող ենք մեր դիրքորոշումը ներկայացնել ցանկացած խնդրի վերաբերյալ»:
Ամեն դեպքում մենք զրուցեցինք նաև կոալիցիոն աշխատանքային խմբի ղեկավար, ԱԺ Պետաիրավական հարցերով մշտական հանձնաժողովի նախագահ Դավիթ Հարությունյանի հետ, սակայն նա նշեց, որ դա ներքին փակ քննարկում էր, հետևաբար չի կարող մանրամասներ հաղորդել խորհրդակցության վերաբերյալ:
