Շիրակի մարզում այս տարի մշակվող հողատարածքներն ավելացել են, քանի որ սովորաբար արտագնա աշխատանքի մեկնողները, որոնք այս տարի մնացել են Հայաստանում, զբաղվում են հողագործությամբ ու տարիներ շարունակ չմշակված հողերը սկսում մշակել։
Երեկ Ազգային ժողովում բյուջեի կատարողականի քննարկման ժամանակ մարզպետները մեկ կարևոր հարց բարձրացրին։ Ներդրողները մարզերում հողատարածքների տրամադրման հետ կապված խնդիրներ են ունենում։ «Առաջին լրատվական»-ի հետ զրույցում Շիրակի մարզպետ Տիգրան Պետրոսյանը նշեց, որ հողերի տրամադրման հարցում միանշանակ որոշում կամ մոտեցում չի լինում։
«Լինում են դեպքեր, երբ ներդրողը կոնկրետ տվյալ համայնքում տեսնում է ներդրում կատարելու կարիք, բայց այդ համայնքն այդքան էլ նպատակահարմար չի այդ ներդրողի կամ այդ գաղափարի համար տարածք տրամադրել»,- ասաց մարզպետը և շեշտեց՝ սա նոր խնդիր չէ, շատ հաճախ է հանդիպում իրենց պրակտիկայում։
Հողատարածքի տրամադրման գործընթացն իրականացվում է քննարկումների արդյունքում։ Մարզպետի խոսքերով՝ իրենք աշխատում են յուրաքանչյուր նման դեպքում ներդրողին և համայնքի բնակչին միմյանց հետ հաղորդակցելու հնարավորություն ստեղծել։ «Երբեմն լինում են դեպքեր, երբ համայնքը, ավագանին կամ այդ հողի սեփականատերը այդ տարածքի մասով այլ պլաններ ու նպատակներ ունի և ուղղակիորեն չի ստացվում տրամադրել։ Մենք փորձում ենք մաքսիմալ՝ թե՛ մեր միջոցներով, թե՛ իրար հետ ուղիղ աշխատելու միջոցով խնդիրը լուծել»,- տեղեկացրեց Շիրակի մարզպետը։
Հարցին՝ համայնքն ավելի շահագրգռված է, որպեսզի ներդրողին չնեղացնի՞, թե՞, այնուամենայնիվ, առաջնորդվում են ավելի շատ համայնքի շահերով, մարզպետն ասաց՝ մեկ միասնական մոտեցում չկա, հարցը պետք է դիտարկել կոնկրետ դեպքերով։ «Մենք դեպք ունեինք, երբ ներդրողը հետաքրքրված էր կոնկրետ համայնքում կոնկրետ տարածքով, սակայն համայնքի բնակիչներն ասում էին, որ այդ տարածքն ու ենթակառուցվածքը իրենց համար այլ նպատակային նշանակություն ունի։ Մենք ներդրողին առաջարկեցինք այլ տարածք, իրենք էլ քննարկեցին մեկ այլ տարածքում գործունեություն ծավալելու հարցը։ Նման մոտեցումները լինում են։ Միանշանակ է, որ բացի համայնքի շահերից, բնակչությունը ներկայացնում է նաև իր շահերը։ Մենք այդ դեպքում փորձում ենք ստեղծել ուղիղ հաղորդակցություն ներդրողի ու հողի սեփականատիրոջ հետ՝ բնակիչ կամ համայնք»,- մանրամասնեց մարզպետ Պետրոսյանը։
Շիրակի մարզպետը մեզ տեղեկացրեց, որ այս տարի մարզում մշակվող հողատարածքների թիվը, նախորդ տարիների համեմատ, ավելացել է։ Պատճառը արտագնա աշխատանքի չմեկնելն է։ Նախնական դիտարկումով, մարզպետի խոսքերով, ավելացում կա, սակայն ավելի հստակ ու ամբողջական տվյալներ կկարողանան ներկայացնել մեկ շաբաթվա ընթացքում։ «Այս պահին, նախնական դիտարկումով, մենք տարբերություն ունենք։ Քանի որ հիմա գյուղվարչություններն արդեն ցանքսերի ու տարածքների ամբողջական փաթեթները, տվյալների բազան ամբողջացնում են, հավանաբար՝ մեկ շաբաթվա ընթացքում հստակ պատկեր կտեսնենք, թե յուրաքանչյուր համայնքում ու վերջնարդյունքում՝ Շիրակի մարզում ինչքան ավելի ցանքատարածություններ ունենք։ Բայց մի բան ակնհայտ է, որ տարբերություն ունենալու ենք»,- իր խոսքն ամփոփեց Շիրակի մարզպետ Տիգրան Պետրոսյանը։