Այժմ կորոնավիրուսի համաճարակի հիմնական բեռը կրում են Ամերիկայի երկրները: Այս մասին հայտարարել է ԱՀԿ-ի առողջապահական ոլորտի արտակարգ իրավիճակների ծրագրի ղեկավար Մայքլ Ռայանը, հայտնում է Reuters-ը:
Ըստ նրա, վիրուսից առավել տուժած 10 երկրներից 4-ը գտնվում են Հյուսիսային կամ Հարավային Ամերիկայում:
Ռայանը նաև նշել է, որ վիրուսը «շատ ակտիվ է» այս տարածաշրջանում: Փորձագետը նշել է, որ առավել մտահոգիչ է Բրազիլիայում տիրող իրավիճակը, մասնավորապես երկրի խիտ բնակեցված քաղաքներում: Թեև Բրազիլիայի առողջապահական համակարգը «դեռ դիմակայում է», բայց վերակենդանացման բաժանմունքներում հիվանդների թիվը մեծ է: Հիվանդության հետ կապված ծանր իրավիճակ է նկատվում նաև Մեքսիկայում:
ԱՀԿ ներկայացուցիչն ընդգծել է, որ «մենք տեսնում ենք հիվանդության հետագա տարածման միտում, մասնավորապես, հարավային կիսագնդի երկրներում: «Որոշ պետություններում կարանտինից դուրս գալու հետ կապված խնդիրներ են առաջանում»,- հավելել է նա:
