Հայտնի է, որ ՄԻԱՎ հիվանդությունները փոխանցվում են սեռական հարաբերության միջոցով, այդ իսկ պատճառով շատ կարևոր է բնակչության սեռական վարքագծի ուսումնասիրությունը՝ վարակի փոխանցման կանխմանն ուղղված նպատակային ծրագրերի մշակման և իրականացման համար: ՄԻԱՎ/ՁԻԱՀ-ի տարածումը կանխելու տեսանկյունից չափազանց կարևոր է սահմանափակ քանակությամբ սեռական զուգընկերների առկայությունը, ինչպես նաև պաշտպանված սեռական հարաբերություն ունենալը:
ՀԺԱՀ 2010-ի շրջանակում տեղեկատվություն է հավաքագրվել հարցմանը նախորդող 12 ամիսների ընթացքում հարցվողի ունեցած սեռական զուգընկերների վերաբերյալ: Վերջին սեռական հարաբերության ժամանակ պահպանակի օգտագործման վերաբերյալ տեղեկատվություն է հավաքագրվել ինչպես կանանցից, այնպես էլ տղամարդկանցից: Ի լրումն նշվածի, հարցվողները պատասխանել են նաև իրենց կյանքի ընթացքում ունեցած զուգընկերների թվաքանակի վերաբերյալ հարցին:
Անշուշտ, նմանօրինակ հարցադրումները խիստ անձնական են, և հարկ է նշել, որ հարցվողների պատասխանները հնարավոր է, որ ոչ լիարժեքորեն անկեղծ լինեն:
Տղամարդկանց 15 տոկոսը նշել է հարցմանը նախորդած 12 ամիսների ընթացքում մեկից ավելի զուգընկերուհի ունենալու փաստի մասին: Երիտասարդ և տարեց տղամարդիկ, ինչպես նաև հարցման պահին ամուսնացած, գյուղաբնակ և ցածր կրթական մակարդակ ունեցող տղամարդիկ առավելապես քիչ են հակված բազմակի սեռական զուգընկերուհիներ ունենալուն: Կոտայքի (26 տոկոս), Երևանի (22 տոկոս) և Գեղարքունիքի (21 տոկոս) մարզերի առնվազն մեկ հինգերորդը նշել է վերջին տարվա ընթացքում մեկից ավելի զուգընկեր ունենալու մասին, մինչդեռ Արագածոտնի, Արարատի, Շիրակի և Վայոց ձորի մարզերի միայն 2 կամ ավելի ցածր տոկոսն է նշել այդ մասին: Գրեթե ոչ մի կին չի նշել բազմակի զուգընկերներ ունենալու մասին՝ վերջին մեկ տարվա ընթացքում:
Հարցմանը նախորդող 12 ամիսների ընթացքում մեկից ավելի զուգընկերուհիների հետ սեռական հարաբերություն ունեցած տղամարդկանց 72 տոկոսը նշել է, որ վերջին սեռական հարաբերության ժամանակ օգտագործել է պահպանակ: Վերջին 12 ամիսների ընթացքում ապահով սեռական հարաբերություն ունեցած տղամարդկանց առավել ցածր տեսակարար կշիռ է գրանցվել 40-49 տարիքային խմբի (23 տոկոս), հարցման պահին ամուսնացած (38 տոկոս) և գյուղական բնակավայրերի (49 տոկոս) տղամարդկանց շրջանում:
Ինչպես արդեն նշվեց, այս ենթախմբերի տղամարդիկ առավել քիչ են հակված նշելու հարցմանը նախորդող 12 ամիսների ընթացքում մեկից ավելի զուգընկերուհի ունենալու մասին:
Երբևէ սեռական հարաբերություն ունեցածների շրջանում, կյանքի ընթացքում ունեցած սեռական զուգընկերների միջին թիվը կանանց պարագայում կազմում է 1.0 (տվյալները ներկայացված չեն), իսկ տղամարդկանց դեպքում՝ 5.8 (ի տարբերություն ՀԺԱՀ 2005 թ.-ի 5.6 ցուցանիշի):
Դեռահասները նշել են, որ իրենց կյանքի ընթացքում նրանք միջինում ունեցել են 2.6 սեռական զուգընկերուհի:
Տղամարդկանց շրջանում կյանքի ընթացքում ունեցած սեռական զուգընկերների միջին թիվն աճում է կրթական մակարդակին զուգահեռ՝ կազմելով 5.4՝ առավել ցածր կրթական մակարդակ ունեցող տղամարդկանց շրջանում և 6.4՝ բարձրագույն կրթությամբ տղամարդկանց շրջանում:
Երևանի, Արմավիրի և Լոռու մարզերի տղամարդկանց շրջանում գրանցվել են կյանքի ընթացքում ունեցած զուգընկերների ամենաբարձր ցուցանիշները (7-ից մինչև 9), մինչդեռ Արագածոտնի, Վայոց ձորի, Արարատի և Շիրակի մարզերի տղամարդիկ նշել են ընդամենը 1-2 զուգընկերուհու մասին:
