Հասարակությունը և իշխանությունը ճգնաժամային իրավիճակներում. այս թեմայի շուրջ «Առաջին լրատվական»-ը զրուցել է Հովհ. Թումանյանի անվան Տիկնիկային թատրոնի տնօրեն Ռուբեն Բաբայանի հետ: Համացանցում տեսանյութ է տարածվել, որտեղ երևում է, թե ինչպես են ոստիկանները ուժ կիրառում դիմակ չկրած քաղաքացու նկատմամբ: Հանրության կողմից այս տեսանյութը տարաբնույթ մեկնաբանությունների արժանացավ:
Ոստիկանության լրատվական ծառայությունից հաղորդեցին, որ քաղաքացին բերման է ենթարկվել, քանի որ չի ենթարկվել ոստիկանի օրինական պահանջներին:
Միջադեպին անդրադարձել է նաև վարչապետ Նիկոլ Փաշինյանը՝ նշելով. «Ոստիկանությունն ուժային կառույց է և սահմանված կանոնների նկատմամբ բացահայտ արհամարհանք ցույց տվողների նկատմամբ օրենքով սահմանված կարգով կարող է և պետք է ուժ կիրառի: Սա իմ պահանջն է ոստիկանությունից, սա նաև հանրության պահանջն է ոստիկանությունից»:
Տեսանյութը չեմ դիտել, բայց եթե քաղաքացին իրեն թույլ է տվել անօրինական գործողություններ, ապա ոստիկանությունն իրավունք ունի կարգի հրավիրել բոլոր թույլատրվող միջոցներով. սա պետք է ընդունվի որպես փաստ»:
Հեղափոխությունը սկսվեց «Ոստիկանը մերն է կարգախոսով»: Այս կարգախոսը, ըստ մեր զրուցակցի, հաջող կարգախոս չէ. «Ոստիկանությունը պետության կարգ ու կանոն հաստատողն է… Ոստիկանից պետք է ոչ թե վախենալ, այլ կատարել հրահանգները»:
Վիրուսն առաջացավ մի շրջանում, երբ հեղափոխության վերելքի, պիկի զգացողությունը դեռ կար, բայց կար նաև այդ վերելքի նկատմամբ մեծ չափով ռևանշիստական տրամադրություն։ Կորոնավիրուսը ի՞նչ որակներ ի հայտ բերեց իշխանության և հասարակության շրջանում։ Այս հարցի վերաբերյալ Ռուբեն Բաբայանը ներկայացրեց իր դիտարկումները:
«Բոլոր բացասական երևույթներն ունեն արմատներ ու սերմեր, ինչ-որ բան ցանել ենք և հիմա հնձում ենք»,- նշեց մեր զրուցակիցը՝ հավելելով, որ երբեք ուշ չէ հետ կանգնել, սխալ է բոլոր քաղաքացիներին մի երանգով ներկայացնելու մոտեցումը:
«Մենք մինչև հիմա չենք որոշել, որ պետություն ենք կառուցում, մենք կառուցում ենք գաղութ,- ընդգծեց Ռուբեն Բաբայանը:- Նաև հանարության որոշակի մասը, որը նաև ազդեցիկ է, չի ուզում ունենալ անկախ պետություն, որը պետությունների հետ հավասար հարաբերությունների մեջ կմտնի և որպես պետություն կստանձնի պարտականություններ: Պետությունը հայրենիք է»:
Մանրամասն՝ տեսանյութում:
