ԱՄՆ-ում ցուցարարները հրդեհել են Վաշինգտոնի Սպիտակ տան մոտակայքում գտնվող Սուրբ Հովհաննես եկեղեցին: Այդ մասին հայտնում է The Washington Post-ը՝ հղում անելով տեղական ոստիկանությանը:
Հրապարակման համաձայն, հրդեհը սկսվել է եկեղեցու նկուղում, հրդեհն արագորեն մարվել է հրշեջների կողմից:
Ըստ հրշեջ ծառայության ներկայացուցչի, եկեղեցու շենքին լուրջ վնաս չի պատճառվել:
Բացի այդ, անհայտ անձը պոկել է ամերիկյան դրոշը եկեղեցու շենքի մոտից և այն նետել է բոցավառվող կրակի մեջ: Միեւնույն ժամանակ մեկ այլ ցուցարար կրոնական հաստատության պատին «Սատանան փողոցի հակառակ կողմում է» բառերով գրաֆիտ է պատկերել:
Սուրբ Հովհաննես Եպիսկոպոսական եկեղեցին հայտնի է նրանով, որ 1815 թվականից՝ իր կառուցումից ի վեր ԱՄՆ բոլոր նախագահներն իրենց պաշտոնավարման ընթացքում գոնե մեկ անգամ եղել են այնտեղ:
Մինեապոլիսի ոստիկանները մայիսի 25-ին փորձել են ձերբակալել աֆրոամերիկացի Ջորջ Ֆլոյդին: Ձերբակալման ընթացքում ոստիկանը ծնկով սեղմել է տղամարդու պարանոցը: Ֆլոյդը գոռացել է, որ խեղդվում է, բայց իրավապահները դրան ուշադրություն չեն դարձրել: Արդյունքում տղամարդը մահացել է վերակենդանացման բաժանմունքում: Սա ԱՄՆ-ում բողոքի զանգվածային ցույցեր և անկարգություններ է հարուցել: