Մարդու իրավունքների եվրոպական դատարանը հրապարակել է իր խորհրդատվական կարծիքը ՀՀ Քրեական օրենսգրքի 300.1 հոդվածի վերաբերյալ՝ ՀՀ Սահմանադրական դատարանի դիմումի հիման վրա: Այս նորությունը հայտնվել է մասնագետների, լրագրողների, քաղաքական շրջանակների քննարկման տիրույթում:
Թեմայի շուրջ «Առաջին լրատվական»- ի հետ քննարկմանը մասնակցեցին քաղաքագետ Ռոբերտ Ղևոնդյանը, ՀԱԿ իրավական հարցերի պատասխանատու Արմեն Խաչատրյանը և «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանը:
Ռոբերտ Ղևոնդյանի դիտարկմամբ՝ քաղաքական առումով այս որոշման շրջանակներում մանևրելու հնարավորություն են ստացել Սահմանադրական դատարանը, ինչպես նաև գործադիր իշխանությունը, և ցանկացած քաղաքական ուժ Հայաստանում հնարավորություն ունի շահարկումների դիմել և իր տեսակետներն առաջ մղել: «ՄԻԵԴ-ի այս պատասխանը ոչ միայն չի որոշակիացնում իրավիճակն այս խնդրի շուրջ, այլ հակառակը՝ ավելի շատ անորոշություններ է մտցնում դաշտ, ինչի արդյունքը կլինի փոխադարձ մեղադրանքներն ու «փոխհրաձգություները»»,- նշեց քաղաքագետը:
Արմեն Խաչատրյանի դիտարկմամբ՝ ՄԻԵԴ-ի այս խորհրդատվական կարծիքից հետո մեղադրանքի կողմը և դատարանը ավելի հստակ դիրքորոշմամբ կարող է այս գործի քննությունն իրականացնել: «Կարծում եմ՝ Ռ. Քոչարյանի թիմը խոստացել էր այնպիսի պատասխան ստանալ ՄԻԵԴ-ից, որը քարուքանդ կաներ գործը, բայց ՄԻԵԴ-ը իր պատասխանով ասել է՝ հանգիստ կարող եք շարունակել ձեր գործը, կատարեք գործի քննություն»,- ընդգծեց ՀԱԿ իրավական հարցերի պատասխանատուն:
Վահագն Ալեքսանյանի խոսքով՝ ՄԻԵԴ-ը խախտում չի տեսել. «Եթե Կոնվենցիայի 7-րդ հոդվածի վերաբերյալ խախտում տեսներ, անպայման իր կարծիքի մեջ կնշեր այդ մասին: ՄԻԵԴ-ը ենթատեքստով զարմանք է արտահայտել իրեն ՍԴ հետ կապ չունեցող հարցեր ուղղելու առնչությամբ»: Վահագն Ալեքսանյանի դիտարկմամբ՝ ՄԻԵԴ-ն իր այս խորհրդատվական կարծիքով ավելի է խորացրել ՍԴ շուրջ ստեղծված ճգնաժամը, քանի որ առանց այդ էլ վստահություն չունեցող ՍԴ-ի նկատմամբ անվստահությունն էլ ավելի կխորանա:
Ռոբերտ Ղևոնդյանը նկատեց, որ ՄԻԵԴ-ի խորհրդատվական կարծիքը պարունակում է այնպիսի դրույթներ, որոնք երկակի մեկնաբանությունների տեղիք են տալիս:
Մանրամասն՝ տեսանյութում: