ԲՀԿ-ի կողմից հնչող քննադատություններից հետո ես նայեցի օրակարգը և տեսա, որ ԲՀԿ խմբակցությունից Արթուր Դալլաքյանը նախագիծ է բերել, որը վերաբերում է տրանսպորտային միջոցների վարորդներին տախոմետրերով զինելուն. Դա, ի դեպ, շատ լավ նախագիծ է, ճիշտ է արել, որ ներկայացրել է, բայց եթե նույն խմբակցության մյուս պատգամավորների տրամաբանությամբ շարժվենք, դա ամենահրատապ հա՞րցն է, ինչի՞ են բերել: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Սուրեն Գրիգորյանը՝ անդրադառնալով ԲՀԿ-ի կողմից հնչող քննադատություններին, թե կարևոր օրակարգային հարցերը թողած իշխող ուժը նորից անդրադառնում է ՍԴ խնդրի լուծմանը:
«Ասածս այն է, որ շատ հաճախ, երբ բովանդակային շատ հակափաստարկներ չունես, բայց ինչ-ինչ պատճառներով պետք է դեմ խոսես, այս պայմաններում կան որոշակի կետեր, որոնց երբ էլ խփես, ակնկալում ես, որ աշխատելու է: Օրինակ, միշտ կարող ես խոսել մարդկանց սոցիալական խնդիրներից: Մարդկանց սոցիալական խնդիրները գլոբալ առումով լուծվում են, երբ պետական ինստիտուտները նորմալ են աշխատում»,-ասաց նա:
