News Georgia-ի փոխանցմամբ՝ Թբիլիսիի մերձակայքում ընկած Վազիանիի ռազմաբազայում շարունակում են ընթանալ Agile Spirit վրաց-ամերիկյան զորավարժությունները։ Դրանց մասնակցում են ԱՄՆ ծովային հետևակայինները և Վրաստանի ցամաքային զորքերի 4-րդ հետևակային բրիգադը։
Հուլիսի 22-ին նրանք հյուրերի համար ցուցադրական զորավարժություն են կազմակերպել Վազիանիի ուսումնական հրաձգարանում։ Զորավարժության սցենարի համաձայն՝ դրա մասնակիցները ճնշել են ապստամբների բազայի դիմադրությունը։
Պատվո հյուրերի թվում էր նաև Վրաստանում ԱՄՆ դեսպան Ջոն Բասը, ով հայտարարել է, որ այս զորավարժությունները լավ նախապատրաստական հիմք են վրացական այն ստորաբաժանումների համար, որոնք Աֆղանստանում Միջազգային անվտանգության աջակցության ուժերի (ISAF) կազմում մասնակցելու են խաղաղապահ գործողությունների։
Հիշեցնենք, որ Agile Spirit զորավարժությունները տևելու են երկու շաբաթ, դրանց նպատակը ռազմական ստորաբաժանումների միջև փոխհամագործակցության ամրագրումը, փորձի փոխանակումը, ապստամբների դեմ ռազմական գործողությունների և խաղաղապահ օպերացիաների անցկացումն է։
Ամերիկյան կողմից զորավարժություններին մասնակցում է 350 հետևակային, որոնք ներառված են ռումինական Կոնստանցա քաղաքում բազավորված հակաահաբեկչական գումարտակի կազմում։ Վրացական կողմից մասնակցում է 450 հետևակային։
Տեսանյութ.