Ռուսական Regnum գործակալությանը տված հարցազրույցում Լեռնային Ղարաբաղում ծնված, խորհրդային հայտնի կինոռեժիսոր, սցենարիստ և պրոդյուսեր Ռոման Բալայանն անդրադարձել է ղարաբաղյան հակամարտության կարգավորմանը.
«Երբ Ադրբեջանը խոսում է բարձր մակարդակի ինքնավարության մասին, նա խոսում է տարածքների և ոչ թե հայկական բնակչության մասին։ Դրա վառ օրինակը Նախիջևանն է։
Չնայած ղարաբաղյան հիմնախնդրի կարգավորմանն առնչվող գագաթնաժողովների շարունակ անցկացմանը, ես կարծում եմ, որ գերտերություններն ամեն դեպքում նախապատվությունը տալու են Ադրբեջանի հետ համագործակցությանը և հանուն դրա պատրաստ են շատ քայլերի։ Դա նրանց իրավունքն է։ Յուրաքանչյուր պետություն պետք է առաջնորդվի սեփական շահերով։
Ես գիտեմ միայն մեկ բան. որքան լավ վերաբերվեն Հայաստանին, այնուամենայնիվ քաղաքական ասպեկտում բոլոր երկրները նախընտրում են Ադրբեջանը, քանի որ այն հարուստ երկիր է և նրա հետ սակարկելու առարկաներ կան։
Մենք հումք չունենք, նավթ չունենք, փոխարենը՝ մենք ունենք ինտելեկտ։ Պետք է զարգանալ այդ ուղղությամբ։ Խոսքը բարձր տեխնոլոգիաների մասին է։ Եթե ինձանից կախված լիներ, ապա ես մեծ միջոցներ կհատկացնեի տվյալ ոլորտի զարգացմանը։
Կարծում եմ, որ սփյուռքը նույնպես կողջուներ այդ նախաձեռնությունը, իսկ մեր հարևաններն էլ կհետաքրքրվեին մեզանով, մեզ հետ համագործակցելու ցանկություն կհայտնեին։ Այդպես է սկսել Ճապոնիան, այդպես է ապրում Իսրայելը։ Ի դեպ, վերջինս նույնպես գտնվում է ոչ բարեկամական հարևանների շրջապատում»։
