Միացյալ Նահանգների Ալերգիայի և վարակիչ հիվանդությունների ազգային ինստիտուտի գիտնականներն ապացուցել են, որ ռեմդեսիվեր դեղամիջոցն իսկապես արագացնում է COVID-19-ով հիվանդների ապաքինումը: Այս մասին հաղորդվել է New England Journal of Medicine ամսագրում հրապարակված հոդվածում:
Կլինիկական փորձարկումներին մասնակցել է SARS-CoV-2 կորոնավիրուսով վարակված 1063 մարդ: Հսկիչ խմբի հիվանդները ստացել են պլացեբո, իսկ փորձարարական խմբի կամավորները 10 օրվա ընթացքում ներերակային ներարկմամբ ստացել են ռեմդեսիվեր դեղամիջոց, ընդ որում, բուժման առաջին օրը ներարկել են 200 միլիգրամ, իսկ հաջորդ օրերին՝ 100 միլիգրամ դեղամիջոց: Միջին հաշվով, դեղամիջոց ստացած հիվանդներն ապաքինվել են 11 օրվա ընթացքում, իսկ նրանք, ովքեր ստացել են պլացեբո, ապաքինվել են 15 օրվա ընթացքում:
Ռեմդեսիվերը նաև նվազեցրել է մահացությունը. փորձարարական խմբում հիվանդների շրջանում մահացությունը կազմել է 7.1 տոկոս, իսկ հսկիչ խմբում՝ 11.9 տոկոս:
Ռեմդեսիվերը հակավիրուսային դեղամիջոց է, որն ի սկզբանե մշակվել է էբոլա վիրուսի դեմ: Մասնագետների կարծիքով, չնայած կորոնավիրուսի դեմ ցույց տված արդյունավետությանը, ռեմդեսիվերը չի կարող համարվել ունիվերսալ դեղամիջոց, քանի որ դրա ընդունման դեպքում մահացության մակարդակը միևնույնն է բավականին բարձր է: