Երեկ Նորվեգիայում տեղի ունեցած երկու ահաբեկչությունների հետևանքով զոհերի թիվը կազմում է առնվազն 87 մարդ: Ոստիկանի շորերով մի նորվեգացու կողմից երիտասարդական ճամբարի մասնակիցների վրա բացված կրակի հետևանքով զոհվել է 80 երիտասարդ: Այս մասին հաղորդում է Reuters գործակալությունը: Նորվեգական իշխանությունները հայտարարում են, որ այս, ինչպես նաև մայրաքաղաք Օսլոյում վարչապետի նստավայրի մոտ տեղի ունեցած պայթյունները հնարավոր է կապ ունեն նորվեգական ծայրահեղ աջ կազմակերպության գործողության հետ:
Մամուլի ասուլիսի ժամանակ ոստիկանության ներկայացուցիչն ասել է, որ հնարավոր է զոհերի թիվը 80-ով չսահմանափակվի, քանի որ շատ մեծ է վիրավորների թիվը: Հաղորդվում է, որ Ութեյա կղզու վրա, որտեղ տեղի է ունեցել այս ահաբեկչությունը, գտնվում էին 600-ից ավել երիտասարդներ: Կղզու վրա տեղի ունեցած ողբերգության հեղինակը ձերբակալված է: Նրա անձնական էջից միայն պարզ է դարձել, որ նա հետաքրքրված է մասոնությամբ և բոդիբիլդինգով: Դրանից քիչ ավելի վաղ տեղի ունեցած պայթյունի հետևանքով զոհերի թիվը հասել է 7-ի: Ոստիկանությունն ասել է, որ հնարավոր է կապ կա Ութոյա կղզում տեղի ունեցածի և Օսլոյի պայթյունի միջև:
Երեկ հեռուստաելույթով հանդես է եկել երկրի վարչապետ Ջեյսոն Ստոլտենբերգը, որն ասել է, որ ի պատասխան երեկվա ահաբեկչությունների, նորվեգական հասարակությունը կլինի ավելի բաց և ժողովրդավար: Թեպետ, երեկ տեղեկություններ են հաղորդվել, որ Նորվեգիան ուժեղացրել է հսկողությունը Շենգենի գոտու երկրների հետ իր սահմանի վրա:
