Հասարակական-քաղաքական մի քանի գործիչներ, «Սասնա ծռեր» կուսակցության անդամներ ընդունել են ազգային-ժողովրդավարական բևեռի կայացման և գործունեության մասին հռչակագիր։Ի թիվս այլ մտքերի, հայտարարության մեջ նշվում է, որ առկա քաղաքական դաշտը կազմալուծված է և ունակ չէ ձևավորելու ու ներկայացնելու ազգի քաղաքական կամքը, և ստեղծված իրավիճակում ազգային-քաղաքական համախմբումը կարող է արդյունավետ լինել վերկուսակցական ձևաչափով. «Մենք՝ ներքոստորագրյալներս, նախաձեռնում ենք ազգային-ժողովրդավարական բևեռի կայացմամբ ու գործունեությամբ այդ նպատակը կյանքի կոչելու գործընթաց, որը պետք է իրականացվի հակաճգնաժամային անցումային ծրագրով: Հռչակված նպատակի իրագործման համար ներկայիս իրավիճակում տեսնում ենք հետևյալ ճանապարհը՝ ճնշում գործադրել իշխանության վրա, որպեսզի նա ձևավորի հակաճգնաժամային անցումային կառավարություն, որն ունակ կլինի անցումային ծրագրի իրականացմամբ ապահովելու ճգնաժամի հաղթահարումը»։
Հռչակագրին միացած գործիչների համոզմամբ՝ նոր Սահմանադրության մշակումն ու ընդունումը և արտահերթ ընտրությունների կազմակերպումը պետք է ավարտվեն մեկամյա ժամկետում, իսկ հակաճգնաժամային անցումային ծրագրի մնացյալ մասը՝ դրանց իրագործման համար անհրաժեշտ ողջամիտ ժամկետում՝ նաև արտահերթ ընտրություններով ձևավորված իշխանության գործունեությամբ:
Քաղաքագետ Ռոբերտ Ղևոնդյանի կարծիքով՝ դրական է այն հանգամանքը, որ քաղաքական դաշտում ձևավորվում են տարբեր ուժեր, որոնք դիրքավորվում են ըստ դաշտի պահանջների.«Բայց կոնկրետ այս ուժի մասին խոսելիս պետք է հաշվի առնենք, որ այդ բևեռը հիմնված է «Սասնա ծռերի» քաղաքական կապիտալի վրա, իսկ «Սասնա ծռերի» քաղաքական կապիտալը մենք տեսել ենք 2018 թվականի ընտրություններին, երբ նրանք չկարողացան հավաքել անհրաժեշտ հինգ տոկոսը ու չհայտնվեցին խորհրդարանում։ Դրա պատճառները տարբեր են, բայց հիմնականն այն է, որ «Սասնա ծռերի» գաղափարախոսությունը չարմատավորվեց ժողովրդի մոտ։ Եվ նաև կարևոր պատճառն այն էր, որ «Սասնա ծռերը» չունեին ֆինանսական այնպիսի ռեսուրսներ, որոնց միջոցով կարողանային հասցնել իրենց գաղափարախոսությունը ժողովրդին՝ տարբեր միջոցառումներ իրականացնելով»,-«Առաջին լրատվական»-ի հետ զրույցում ասաց նա։
Մեր զրուցակցի դիտարկմամբ՝ երբ այսօր ազգային-ժողովրդավարական բևեռը խոսում է արտահերթ ընտրությունների մասին՝ պարզ է դառնում, որ մասնակիցները քաղաքական հաշվարկներ չեն կատարել.«Այդ հաշվարկները կատարելու դեպքում ակնհայտ կդառնա, որ արտահերթ ընտրությունների արդյունքում նրանց խորհրդարանում հայտնվելը քիչ հավանական է։ Համենայնդեպս այն ձևաչափով, որն այսօր առկա է՝ հին Ընտրական օրենսգիրք, որն ունի լուրջ խնդիրներ, նաև առանց իրավաքաղաքական գնահատականի, որի դեպքում ընտրություններին կմասնակցեն շատ նախկիններ։ Ի դեպ նրանք շատ ավելի լուրջ հնարավորություններ ունեն Ազգային ժողովում հայտնվելու, օրինակ՝ Հանրապետական կուսակցությունը 4, 7 տոկոս ձայն էր ստացել, 3 տոկոսից ավելի Դաշնակցությունը, իսկ ազգային ժողովրդավարական բևեռն այս պայմաններում խորհրդարանում հյատնվելու շատ քիչ հնարավորություններ ունի»։
Քաղաքագետը գտնում է, որ նրանց մոտեցումն այս պահի դրությամբ ժամանակավրեպ է. «Բացի այդ՝ Հայաստանի Հանրապետությունում տեղի ունեցող գործընթացները թեև աչքի չեն ընկնում շատ մեծ քաղաքական կայունությամբ, այնուամենայնիվ այսօր այնպիսի իրավիճակ է, որ արտահերթ խորհրդարանական ընտրությունների մասին խոսելու կարիք չկա և մենք գնում ենք դեպի հերթական խորհրդարանական ընտրություններ՝ 2023 թվականին»։
Կարո՞ղ ենք ականատես լինել «Սասնա ծռերի» ապաքաղաքական գործողություններին, ինչպես դա եղավ 2016 թվականի հուլիսին, դիտարկմանն ի պատասխան՝ Ռոբերտ Ղևոնդյանն ասաց, որ այսօր քաղաքական իրավիճակն այլ է. «Իրավիճակը շատ տարբեր էր։ Եվ ես չեմ կարծում, որ այն ուժերն ու անհատները, որոնք այսօր այդ բևեռում են ունեն այնպիսի ռադիկալ մարտավարություն, ինչպիսին, որ «Սասնա ծռերը»։ Հաշվի առնենք մի կարևոր հանգամանք՝ ՊՊԾ գնդի գրավման գործընթացի ժամանակ «Սասնա ծռերի» ներկայիս ղեկավար Ժիրայր Սեֆիլյանը գտնվում էր անազատության մեջ և անձամբ չէր ղեկավարում իրավիճակը։ Բացի այդ՝ այնտեղ կան մարդիկ, օրինակ Արկադի Վարդանյանը, Արա Պապյանը, որոնք բավականին հավասարակշիռ վարքի դրսևորմամբ են աչքի ընկել ու ես չեմ կարծում, թե այսօր հնարավոր է այնպիսի գործողություն, ինչպիսին որ տեղի ունեցավ 2016 թվականին։ Անկախ նրանից, թե մենք ինչպիսի անուն կտանք դրան՝ ապստամբությու՞ն, թե՞ ահաբեկչություն։ Այսօրվա քաղաքական իրողություններն այնպիսին են, որ բռնի գործողություններ իրականացնելու կարիք չկա ու ես դրա հավանականությունը շատ փոքր եմ գնահատում»,-եզրափակեց նա։
